BRUKSEL – BE: Gaza pjesë integrale e shtetit të ardhshëm palestinez
BRUKSEL, 6 shkurt /ATSH-ANSA/ – Gaza pjesë integrale e shtetit të ardhshëm palestinez, tha sot Bashkimi Evropian, pas deklaratave të presidentit Trump për enklavën palestineze.
“Ne jemi njohur me komentet e presidentit Trump”, deklaroi zëdhënësi i Bashkimit Evropian, Anouar El Anouni gjatë konferencës së përditshme për shtyp.
”Bashkimi Evropian mbetet plotësisht i përkushtuar ndaj zgjidhjes me dy shtete, e cila ne besojmë se është e vetmja rrugë drejt paqes afatgjatë si për izraelitët ashtu edhe për palestinezët”, theksoi ai.
”Gaza është një pjesë integrale e një shteti të ardhshëm palestinez, është një pjesë thelbësore e politikës së ardhshme të atij shteti dhe nuk duhet të ketë zhvendosje të mëtejshme të detyruara të palestinezëve”, përfundoi El Anouni./ a.jor.