“Babai im është marrë nga ICE”, marinsi i USS Abraham Lincoln rrëfen dramën. Autoritetet amerikane: Pasja e një familjari në ushtri nuk është leje për të shkelur ligjet

Babai i një marinsi amerikan që ndodhet në bordin e aeroplanmbajtëses USS Abraham Lincoln, e cila ishte dislokuar në Lindjen e Mesme gjatë luftës me Iranin, është ndaluar nga autoritetet federale të emigracionit në SHBA, ka bërë të ditur i biri.

Sipas një zëdhënësi të Departamentit amerikan të Sigurisë Kombëtare (DHS), Luis Manuel Aviles Roa, me origjinë nga Nikaragua, u arrestua nga patrulla kufitare pas një kontrolli të automjetit në Key West, Florida.

Djali i tij, Joshua Aviles, i cili shërben në marinën amerikane, ka treguar përmes një postimi se ka më shumë se nëntë muaj i dislokuar në det, në Lindjen e Mesme, në bordin e USS Abraham Lincoln.

“Kam më shumë se nëntë muaj i dislokuar, në det në Lindjen e Mesme, në bordin e USS Abraham Lincoln, duke luftuar për një vend që më ka dhënë gjithçka. Sapo mora një telefonatë se babai im është marrë nga ICE”, shkroi ai.

Joshua Aviles tha se babai i tij kishte patentë drejtimi, kartë të sigurimeve shoqërore dhe leje pune. Ai shtoi se familja kishte ndjekur procedurat e emigracionit për të marrë kartën e qëndrimit të përhershëm, të njohur si “green card”, dhe se aktualisht po priste për miratimin e saj.

“Është zemërthyese për mua. Nuk e di se si mund të vazhdoj të punoj 12 apo më shumë orë në ditë, duke e ditur se babai im është diku, ndoshta duke u trajtuar si kriminel”, tha marinari amerikan.

DHS: Ka hyrë ilegalisht në SHBA
Departamenti i Sigurisë Kombëtare deklaroi se Luis Manuel Aviles Roa kishte hyrë në Shtetet e Bashkuara në mënyrë të paligjshme dhe se do të qëndrojë në paraburgim të Shërbimit të Emigracionit dhe Doganave (ICE), ndërsa do të vijojnë procedurat për largimin e tij nga vendi.

“Pasja e një familjari në ushtri nuk është leje për të shkelur ligjet e vendit tonë”, deklaroi DHS.

Organizatat për të drejtat e njeriut kanë kritikuar fushatën e ashpër të administratës së Donald Trump kundër emigracionit, duke argumentuar se ajo ka cenuar të drejtat e lirisë së shprehjes dhe procesit të rregullt ligjor, si dhe ka krijuar një klimë pasigurie, veçanërisht për minoritetet etnike që kanë ngritur shqetësime për profilizimin racor.

Aeroplanmbajtësja USS Abraham Lincoln u largua nga Lindja e Mesme të shtunën, pasi kishte qëndruar në det për më shumë se 200 ditë pa hyrë në asnjë port.

Sipas ligjvënësve demokratë, kjo përbën një rekord modern për numrin e ditëve të njëpasnjëshme në det. Ata kanë kërkuar përgjigje pasi familjarët e marinarëve kanë ngritur shqetësime lidhur me kushtet e vështira të jetesës dhe moralin e ekuipazhit në bordin e anijes.

Ndërkohë, aeroplanmbajtësja USS George Washington mbërriti në Lindjen e Mesme javën e kaluar dhe pritet të zëvendësojë USS Abraham Lincoln në këtë zonë.