Balla: Forcojmë miqësinë dhe bashkëpunimin shqiptaro-gjerman edhe në nivel të landeve
TIRANË, 21 tetor /ATSH Kryetari i grupit parlamentar të Partisë Socialiste dhe njëkohësisht i grupit parlamentar të Miqësisë Shqipëri–Gjermani, Taulant Balla ka falënderuar kryeministrin e landit Baden-Württemberg, Cem Özdemir, për pritjen e delegacionit parlamentar shqiptar gjatë vizitës zyrtare në Shtutgart, më 18–20 tetor.
Përmes një postimi në rrjetet sociale, Balla ka vlerësuar marrëdhëniet e shkëlqyera ndërmjet Shqipërisë dhe Gjermanisë, duke theksuar rëndësinë e forcimit të bashkëpunimit edhe në nivel të landeve gjermane.
“Kryeministri i Landit të Baden-Württemberg Cem Özdemir bëhet kuq e zi. Faleminderit për mikpritjen e delegacionit tonë dhe forcojmë bashkëpunimin dhe miqësinë e shkëlqyer shqiptaro-gjermane edhe në nivel landi. Mirënjohje për mbështetjen e dhënë për diasporën shqiptare”, shkruan Balla.
Postimi shoqërohet me një fotografi të kryeministrit Özdemir, i cili mban në duar fanellën kuqezi të Kombëtares shqiptare, me emrin e tij dhe numrin 90, një dhuratë simbolike e miqësisë shqiptaro-gjermane.
Vizita e delegacionit parlamentar shqiptar në Shtutgart përfshiu takime me përfaqësues të lartë të qeverisë dhe parlamentit të landit Baden-Württemberg, mes tyre kryeministri Cem Özdemir, sekretarin e Shtetit për Marrëdhëniet Ndërkombëtare Florian Haßler dhe kryetarin e Komitetit për Evropën dhe Marrëdhëniet Ndërkombëtare në Parlamentin e Landit, Peter Hauk.
Në fokus të vizitës ishte forcimi i marrëdhënieve institucionale dhe parlamentare, mbështetja për procesin e integrimit evropian të Shqipërisë, si dhe zgjerimi i mundësive të bashkëpunimit ekonomik, investimeve, arsimit profesional dhe inovacionit.
Një vëmendje e veçantë iu kushtua edhe diasporës shqiptare në Baden-Württemberg, si një urë e rëndësishme lidhëse ndërmjet dy vendeve.
/gj.m/j.p/r.e/