Berisha: Ergys Agasi është parë duke shkuar në Surrel, së shpejti do t’i hiqet edhe masa e arrestit

Kreu i Partisë Demokratike, Sali Berisha, ka hedhur akuza të forta lidhur me çështjen e Ergys Agasi, duke pretenduar se ai është parë së fundmi duke lëvizur lirshëm në drejtim të Surrel.

Sipas Berishës, referuar edhe denoncimeve të “qytetarit dixhital”, Agasi është parë me automjetin e tij duke u ngjitur drejt Surrelit, ndërsa ngriti pikëpyetje nëse ai po fshihet apo po zhvillon takime në zonë.

Ai pretendoi se ndaj Agasit pritet të hiqet masa e arrestit, duke akuzuar drejtpërdrejt kryeministrin Edi Rama dhe kreun e Gjykatës së Lartë Sokol Sadushi për ndërhyrje në këtë çështje.

Së dyti, vazhdojnë qarkullimi i Ergys Agasit, i lirshëm fare, dhe sipas qytetarit dixhital, ai është parë me makinën e tij, jo në eskortën e Edi Ramës siç ka qenë përpara, por është parë në një rrugë duke shkuar në Surrel, duke u ngjitur përpjetë.
A fshihet ai në Surrel apo shkoi për një takim në Surrel, këtë nuk mund ta them.
Por u them me siguri se Ergys Agasi, që së shpejti do i hiqet masa e arrestit, sepse Edi Rama me Sokol Sadushin e çliroi Agasin nga masa e arrestit si person nën hetim.
Nuk ka më masë arresti për Agasin kështu që gjithçka po shkon drejt konsolidimit të narkoregjimit dhe janë vetëm shqiptarët, qytetarët shqiptarë që do marrin fatin në duart e tyre.
22 marsi është dita e kryengritjes më të fuqishme paqësore që ka njohur Shqipëria në tërë historinë e saj.
Ndaj dhe ftoj çdo shqiptar në rrugët dhe sheshet e Tiranës të tregojmë revoltën, zemërimin, përçmimin tonë ndaj këtij regjimi.