Berisha: Universitetet të rendin drejt cilësisë

Cilësia dhe liria akademike, kanë qenë kryefjala e kryeministrit Berisha në konferencën e organizuar për renditjen e universiteteve. Duke bërë të qartë, se cilësia mbetet prioritet në arsimin e lartë, Berisha theksoi se universitetet duhet të rendin pas cilësisë e cila sipas tij, është kushti vendimtar për lirinë akademike.

“Duhet të rritet cilësia e sistemit arsimor. Asnjë cilësi nuk është njëherë e përgjithmonë e dhënë. Duhet të biem dakort se cilësia si kushti më vendimtar ka lirinë akademike. Liria akademike do të thotë mosndërhyrja e qeverisë në universitete. Ju garantoj se qeveria është e vendosur të konsolidojë qëndrimin më të hapur ndaj jush. Liria akademike e rektorit, mund të cenohet nga ministri dhe nuk duhet të cënohet në asnjë mënyrë. Liria akademike e dekanit mund të cënohet nga dekani. Kur flitet për liri akademike, flitet për liri akademike të pedagogut”, u shpreh Berisha.

Po ashtu gjatë fjalës së tij, kreu i qeverisë ka deklaruar se në sistemin tonë arsimor janë bërë ndryshime rrënjësore dhe se në një periudhë të shkurtër kohore, është trefishuar numri i studentëve në universitetet tona.

“Ky proces është hap i rëndësishëm, i domosdoshëm. Në garë ka tregues dhe duhet t`i pranojmë”, nënvizoi ndër të tjera ai. I pranishëm në këtë konferencë ka qenë edhe Ministri i Arsimit, Myqerem Tafaj, i cili ka sqaruar projektin e akreditimit të universiteteve private në vendin tonë. Sipas tij, në projektin për renditjen e universiteteve, janë përzgjedhur katër fusha, ku studentët mund të informohen për programet e studimit në universitetet private.

“Sistemi i arsimit ka pësuar një moderim, ai është përshtatur me kushtet e arsimit të lartë në Shqipëri. Ndërkohë që ne po përgatisim paketën financiare”, nënvizoi ai, ndërsa ka shtuar se akreditimi është bërë sipas standarteve dhe cilësisë së universiteteve.