Berisha: Uroj që Serbia të shkëputet nga politika vasale ndaj Kremlinit
TIRANË, 26 tetor/ATSH/ Kryetari i Partisë Demokratike, Sali Berisha, reagoi sot pas humbjes së zgjedhjeve në Serbi nga ish-presidenti serb Aleksandër Vuçiç.
Në një konferencë për mediet, Berisha e cilësoi Vuçiçin si një nga figurat më të errëta të politikës në Ballkan pas Sllobodan Millosheviçit, duke e akuzuar për lidhje me politikat nacionaliste serbe dhe për mbështetje të interesave ruse në rajon.
“Aleksandër Vuçiç ishte një kukull e Vladimir Putinit në Ballkan, i cili pas agresionit rus ndaj Ukrainës, e shndërroi Serbinë në prapavijë të fuqishme të Rusisë në rajon”, deklaroi Berisha.
Kreu i PD-së akuzoi Vuçiçin dhe kryeministrin Rama se kishin vepruar në funksion të ndarjes së Kosovës. Berisha shtoi se, dy liderët ndërmorën nisma si “Ballkani i Hapur”, të cilat Berisha i cilësoi si të porositura nga Kremlini.
Berisha u shpreh se zhvillimet politike në Serbi përbëjnë, sipas tij, një fitore të rinisë dhe qytetarëve serbë, ndërsa pretendoi se rezultatet zgjedhore shënojnë dobësimin e forcave politike të lidhura me Vuçiçin dhe të partisë së Ivica Daçiçit.
“Studentët, kauza e tyre fitoi”, deklaroi Berisha, duke shprehur shpresën që drejtuesit e ardhshëm të Serbisë të ndjekin një politikë properëndimore dhe të fqinjësisë së mirë, të shkëputur nga ndikimi i Kremlinit.
Berisha uroi që fituesi i zgjedhjeve në Serbi, Ilija Srdanovic në interesin më të mirë të zgjedhësve dhe vendit të tij të ndjekë një politikë të fqinjësisë së mirë, properëndimore dhe të shkëputet nga politika vasale ndaj Kremlinit.
/gj.m/j.p/r.e/