Berisha në KiE: Shqipëria rrezikon shpopullimin

Shqipëria përballë një kërcënimi ekzistencial, Berisha në KiE: Nga çdo 1 mijë shqiptarë, 466 jetojnë në BE

Shqipëria ndodhet përballë një kërcënimi ekzistencial, atë të shpopullimit. Kështu u shpreh kreu i Partisë Demokratike, Sali Berisha, gjatë fjalës së tij në Asamblenë Parlamentare të Këshillit të Europës.

Berisha theksoi se emigracioni po shkakton pasoja të rënda demografike në Shqipëri dhe kërkoi një qëndrim ndërkombëtar ndaj situatës.

Duke iu referuar të dhënave të Eurostat-it, kreu i PD-së tha se nga çdo 1 mijë shqiptarë, 466 jetojnë në vendet e Bashkimit Evropian.

“Asnjë komb nuk mund dhe nuk duhet të jetë më krenar për diasporën e tij sesa kombi shqiptar. Diasporës i detyrohemi pothuajse mbijetesën tonë, liritë tona, si dhe një kontribut të jashtëzakonshëm në kulturën tonë. Por sot, për fat të keq, më duhet t’ju paraqes një tablo të tmerrshme, një efekt shkatërrues të emigracionit në vendin tim.

Sponsorizuar

Justin Gast, në një studim të kryer në 149 vende, ka arritur në përfundimin se emigracioni mund të shkaktojë një rrjedhje demografike dhe të ketë pasoja shumë të rënda. Në Shqipëri, kjo e ka vendosur kombin përballë një kërcënimi real ekzistencial.

Aktualisht, në hapësirën e Bashkimit Evropian, sipas Eurostat-it, nga çdo 1 mijë shqiptarë, 466 jetojnë në vendet e BE-së. Imagjinoni se në çfarë gjendjeje ndodhemi.

Kjo është tërësisht pasojë e narkoshtetit shqiptar, i cili është narkoshteti i vetëm në botë, por fatkeqësisht ende i panjohur dhe i pavlerësuar si i tillë nga Evropa. Shqipëria është eksportuesja e parë e kanabisit, ndërsa kartelet shqiptare të drogës janë transportuesit më të mëdhenj të kokainës në Evropë.

Për ta përmbyllur, është jetike një qëndrim ndërkombëtar ndaj këtij narkoshteti, për të shpëtuar kombin”, u shpreh Berisha.a.b