Blendi Shkëmbi: Titulli kampion me Ballkanin? Kam besim

Blendi Shkëmbi është gati për të vazhduar aventurën e tij të re, atë të trajnerit të Ballkanit në Superligën e Kosovës. Për trajnerin shqiptar kjo është eksperienca e dytë në këtë kampionat, kujtojmë që më parë ka drejtuar dhe Lirinë. Në një lidhje direkte me “Rubrika Sportive” në Radio Tirana, Shkëmbi ka deklaruar ka deklaruar: “Kisha kohë që isha në bisedime me drejtuesit e Ballkanit, më në fund arritëm një marrëveshje. Mendoj se e njoh mirë këtë skuadër dhe kampionatin e Kosovës në përgjithësi. Ekipi ka lojtarë me cilësi, të cilët mendoj se më përshtaten dhe mua me mënyrën se si e shikoj futbollin”.

Një mision i vështirë për titullin kampion përballë rivalëve si Drita, Gjilani e Prishtina, por trajneri i ri i Ballkanit beson. “Është e vështirë. Të dalësh kampion asnjëherë nuk është e thjeshtë, por unë kam besim te futbollistët, kam besim te puna e bërë deri tani. Klubi dhe ish-trajneri kanë bërë një punë shumë të mirë. Kam besim se mund të dalim kampion, i kemi të gjitha mundësitë”.

Më parë te Liria, tani te Ballkani: “Janë dy situate të ndryshme. Tani kam pak më shumë eksperiencë. Të vazhdojmë si duhet këtë rrugë që klubi ka nisur në këto dy vitet e fundit. Këtu ka lojtarë më shumë, më me eksperiencë. Në krahasim me periudhën e parë, futbolli është rritur, është bërë më profesionist. Besoj se të gjitha këto janë një ndihmë më shumë për mua, që ta kemë më të thjeshtë”, ka përfunduar Shkëmbi