Blinken: Kosova dhe Serbia do përballen me kompromise të vështira për normalizimin e marrëdhënieve

Udhëheqësit e Kosovës dhe Serbisë do të duhet të bëjnë “kompromise të vështira” për të zgjidhur çështjet e pazgjidhura dhe për të normalizuar marrëdhëniet e tyre, tha Sekretari amerikan i Shtetit Antony Blinken.

Të dërguarit e SHBA-së dhe BE-së po u bëjnë presion vendeve që të miratojnë një plan paqeje të paraqitur në mes të vitit 2022, sipas të cilit Beogradi do të ndalonte lobimin kundër Kosovës që të ketë një vend në organizatat ndërkombëtare, përfshirë Kombet e Bashkuara, ndërsa Kosova do të angazhohet për formimin e një asociacioni të komunave me shumicë serbe sipas propozimeve.

“Kam besim se normalizimi i marrëdhënieve ndërmjet Serbisë dhe Kosovës do të sjellë siguri dhe prosperitet për Serbinë dhe të gjithë qytetarët e Ballkanit Perëndimor. Sigurisht, liderët serbë dhe kosovarë do të bëjnë kompromise të vështira për të arritur këto qëllime, por shpërblimet për popullin serb dhe gjithë rajonin do të jenë të mëdha”, tha Blinken gjatë një deklarate urimi për Serbinë që shënoi Ditën e Shtetësisë.

Si Beogradi ashtu edhe Prishtina e kanë pranuar planin e BE-së në parim, duke thënë se ai është një bazë e mirë për negociata të mëtejshme. Normalizimi i marrëdhënieve me Kosovën është një nga kushtet kyçe për përparimin e Serbisë drejt anëtarësimit në BE.

Blinken i kërkoi gjithashtu Serbisë “të mbështesë Ukrainën kundër luftës së paprovokuar, të pajustifikuar dhe brutale të Rusisë”.

/rtsh.al/