Blinken sërish në Lindjen e Mesme, kërkon rifillimin e bisedimeve Izrael-Hamas
Sekretari amerikan i Shtetit Antony Blinken do të kthehet në Lindjen e Mesme ditën e sotme në një përpjekje për të rifilluar bisedimet e bllokuara lidhur me marrëveshjen mbi pengjet dhe armëpushimin midis Hamasit dhe Izraelit.
Megjithatë, këtë herë ai do të kalojë shtetin hebre dhe do të shkojë drejt e në Kajro, ku çështja e Korridorit të Filadelfit vazhdon të jetë pika e bllokimit të bisedimeve.
“Sekretari do të takohet me zyrtarët egjiptianë për të diskutuar përpjekjet e vazhdueshme për të arritur një armëpushim në Gaza që siguron lirimin e të gjithë pengjeve, zbut vuajtjet e popullit palestinez dhe ndihmon në vendosjen e sigurisë më të gjerë rajonale”, tha Departamenti i Shtetit për udhëtimin.
Meqenëse samiti i nivelit të lartë në Doha rreth dy javë më parë përfundoi pa ndonjë përparim, bisedimet duket se janë ndërprerë.
Administrata Biden thuhet se po vonon të paraqesë një propozim “përfundimtar” përpara se të jetë e sigurt se do të pranohet, nga frika se nëse propozimi refuzohet, ai mund të çojë në një ndërprerje përfundimtare të bisedimeve.
Zëdhënësi i Departamentit të Shtetit, Mattheë Miller, u tha gazetarëve se SHBA po punonte me Egjiptin dhe Katarin për të siguruar “një propozim që mund t’i çojë palët në një marrëveshje përfundimtare”.
Pa paraqitur një plan kohor, Miller tha, “ne po punojmë me shpejtësi për të zhvilluar atë propozim, të përpiqemi të gjejmë diçka që do t’i bënte të dyja palët të thonë “po” dhe ta dorëzojnë atë zyrtarisht”.
Megjithatë, ambasadori i SHBA-së në Izrael, Jack Lew kohët e fundit pranoi se SHBA-të nuk janë të sigurta se çfarë do të ishte e gatshme të pranonte Hamasi.
“Ne po bëjmë presion sa të mundemi, nga presidenti e deri te i gjithë ekipi për të arritur një marrëveshje për një armëpushim [Gaza] dhe një lirim të pengjeve. Ne nuk e dimë se çfarë është i gatshëm të pranojë Hamasi dhe ne po bëjmë presion që Izraeli, Shtetet e Bashkuara, Katari dhe Egjipti të arrijnë në një pikë të përbashkët”, tha Lew në Konferencën e Sigurisë Kombëtare të hënën.
/rtsh.al/