Blinken takon Ministrat e Jashtëm të Armenisë dhe Azerbajxhanit: Koha që diplomatët të kthehen në tryezë
Sekretari amerikan i Shtetit Antony Blinken është takuar sot (20 shtator) me Ministrin e Jashtëm armen Ararat Mirzoyan dhe Ministrin e Jashtëm të Azerbajxhanit lidhur me luftën që shpërtheu mes dy vendeve javët e fundit. Por ndonëse më 15 shtator Armenia dhe Azerbajxhani ranë dakord për armëpushim, Blinken u ka përcjellë në takim dy ministrave mesazhin se është koha që diplomatët të kthehen në tryezë.
“Sot prita bisedimet e drejtpërdrejta mes ministrit të Jashtëm armen@AraratMirzoyan dhe ministrit të Jashtëm të Azerbajxhanit @bayramov_jeyhun. Siç e kam përcjellë gjatë takimit, është koha që trupat të shkëputen dhe diplomatët të kthehen në tryezë”, shkruan Blinken në rrjetin social Twitter.
Marrëdhëniet midis dy ish-republikave sovjetike janë acaruar që nga viti 1991 për enklavën e diskutueshme të Nagorno-Karabakut. Konflikti për kontrollin e saj u përshkallëzua përsëri në vjeshtën e vitit 2020, kur shpërtheu një luftë 44-ditore, gjatë së cilës forcat azere morën kontrollin e disa sektorëve. Lufta përfundoi falë një marrëveshje paqeje të ndërmjetësuar nga Rusia, por Baku dhe Jerevani herë pas here kanë akuzuar njëri-tjetrin për shkelje të armëpushimit përgjatë kufirit.
/rtsh.al/