Bllokimi i aksit “Librazhd-Prrenjas” sjell fluks në pikën doganore të Bllatës

Dëmtimi i rrugës që lidh Tiranën me juglindjen ka ngarkuar trafikun në doganën e Bllatës.

Pas marrëveshjes me Maqedoninë e Veriut i gjithë trafiku, kryesisht mjetet e rënda, janë kthyer nga Qafë Thana në drejtim të Bllatës dhe nëpërmjet rrugës së Arbrit drejt Tiranës e Durrësit.

Vetëm dy ditët e fundit, janë përpunuar rreth 400 kamionë, të cilët vijnë nga Greqia, Turqia, Bullgaria e Maqedonia e Veriut.

Janë me qindra kamionë që presin radhën për t’u përpunuar, por kapacitetet përpunuese janë të vogla.

Mungesa e një terminali doganor, numri i vogël i doganierëve dhe agjentëve doganorë, numri i ulët i kontrollorëve të policisë dhe mungesa e kabinave vështirësojnë situatën dhe krijojnë radhë të gjata, raporton gazetari i Klan News, Neki Feta.

Dogana e Bllatës, pas hapjes së rrugës së Arbrit, ka marrë rreth 30% të trafikut të Qafë Thanës edhe në ditë të zakonshme.

Fakti që distanca Shkup – Qafë Thanë – Tiranë është 298 km, ndërsa Shkup – Dibër – Tiranë është 212 km, rreth 85 km më pak, ka bërë që qytetarët nga Maqedonia perëndimore të zgjedhin këtë rrugë për të ardhur në Shqipëri.