Bllokohet rruga Tirane-Elbasan

Policia ka bllokuar plotësisht qarkullimin rrugor në aksin Tiranë-Elbasan dhe shkak për këtë janë bërë reshjet e dendura të dëborës që kanë përfshirë Qafë-Krrabën.

Të udhëtojnë drejt Elbasanit nuk lejohen as automjetet të cilat janë të pajisura me zinxhirë dhe aktualisht, aksi është totalisht i bllokuar.

Masa është marrë për të parandaluar aksidente tragjike në këtë rrugë në të cilën nuk është hedhur as kripë dhe as skorje për zhbllokimin e saj.

Të gjitha mjetet e nisura nga Tirana drejt Elbasanit dhe anasjelltas janë kthyer nga policia, që u ka këshilluar të përdorin rrugë alternative,  duke i rënë nga Durrësi.