Bordi i Transparencës vendos tavanet e reja të çmimeve, nafta do të shitet me 201 lekë, benzina 187 lekë.
Bordi i Transparencës ka përcaktuar këtë të mërkurë tavanet e reja të çmimeve të karburanteve në vend, duke vendosur që nafta të tregtohet me pakicë jo më shumë se 201 lekë për litër, ndërsa benzina në nivelin e 187 lekëve për litër. Vendimi, i cili hyn në fuqi në të gjitha pikat e shitjes duke filluar nga ora 18:00 e ditës së sotme, mban në fuqi aplikimin e plotë të akcizës, për shkak se çmimet mbeten nën pragun e përcaktuar në Aktin Normativ të fillim-prillit.
Sipas vendimit të marrë në mbledhjen e datës 13 maj, tregtimi me shumicë i nënproduktit gazoil (naftë) i standardit SSH EN 590, nuk do ta kalojë vlerën e 189 lekëve për litër. Ndërkohë, për nënproduktin benzinë të standardit SSH EN, çmimi i shumicës është fiksuar në 175 lekë për litër. Këto tarifa do të jenë të vlefshme deri në mbledhjen e ardhshme të Bordit, ku do të bëhet një rivlerësim i mundshëm i tregut.
Autoritetet theksojnë se ky mekanizëm rregullues vjen si një bashkërendim i institucioneve qendrore për stabilitetin e tregut. Në një qëndrim të përbashkët të lëshuar nga Ministria e Ekonomisë dhe Inovacionit, Ministria e Financave dhe ajo e Infrastrukturës dhe Energjisë, nënvizohet vëmendja ndaj mbrojtjes së qytetarëve.
“Jemi të angazhuar të mbrojmë interesat e konsumatorëve shqiptarë dhe të ruajmë parimet e konkurrencës së ndershme në treg,” thuhet në deklaratën zyrtare të dikastereve.
Një element i rëndësishëm i këtij njoftimi lidhet me nivelin e taksimit dhe sqarimin e metodologjisë. Bordi saktëson se për llogaritjen e këtyre çmimeve tavan është zbatuar kuadri i ri ligjor, konkretisht Akti Normativ nr. 1, datë 3 prill 2026. Ky akt parashikon një lehtësim fiskal vetëm në rastet e kalimit të një pragu të caktuar çmimi.
“Në rast se çmimi i shitjes me pakicë për gazoilin është më i lartë se 220 lekë/litri, apo për benzinën është më i lartë se 200 lekë/litri, zbatohet niveli 80% i akcizës,” sqaron institucioni. Megjithatë, për shkak të kuotave aktuale në bursa, Bordi thekson se: “Çmimet e vendosura sot janë nën kufirin e Aktit Normativ dhe për rrjedhojë, niveli i akcizës do të zbatohet i plotë, në masën 100%.”
Në përfundim, Bordi i Transparencës ka përcjellë një paralajmërim të prerë ndaj të gjithë operatorëve të tregut të hidrokarbureve. Çdo pikë shitjeje është e detyruar të respektojë marzhet e vendosura pa asnjë përjashtim.
“Tërheqim vëmendjen e çdo operatori të shitjes me shumicë dhe pakicë mbi detyrimin e zbatimit të këtij vendimi. Në rast të shkeljeve të konstatuara do të vendoset pezullimi i aktivitetit,” paralajmëron Bordi.
/rtsh.al/