Braçe shpërthen ndaj Ramës: Je i dashuruar me pushtetin, prano gabimet! Nuk më blen e as më shantazhon dot!

Deputeti i Partisë Socialiste, Erion Braçe, ka reaguar pas debatit të krijuar për votën e tij lidhur me Reformën Territoriale, duke shpjeguar arsyet që e çuan të mbajë këtë qëndrim dhe duke iu përgjigjur kritikave të ardhura nga kryeministri Edi Rama dhe figura të tjera publike. Në një reagim të gjatë, Braçe thekson se vota e tij ishte një zgjedhje personale, e bazuar në bindjen se projektligji për ndarjen administrative dhe territoriale nuk përbën një reformë të mirëfilltë. Ai mohon të ketë vepruar nën ndikimin e dikujt tjetër dhe këmbëngul se nuk ka tradhtuar as socialistët dhe as qytetarët që e kanë votuar ndër vite.

Deputeti socialist i është përgjigjur edhe deklaratave të kryeministrit, duke kërkuar që Rama të shpjegojë se cilat janë “duart e pista” që, sipas tij, mund të kenë ndikuar në votën e Braçes. Ai kundërshton përpjekjet për ta lidhur qëndrimin e tij me persona apo interesa të tjera dhe i kërkon kryeministrit të mos flasë në emrin e tij. Braçe thekson se, siç pretendon edhe vetë Rama, ai nuk ka votuar pro kryeministrit dhe se kjo çështje duhet të marrë fund këtu.

Në reagimin e tij, Braçe kritikon gjithashtu mënyrën se si, sipas tij, ushtrohet autoriteti brenda Partisë Socialiste. Ai e konsideron të papranueshme që një deputeti t’i pranohet se ka të drejtë, por më pas qëndrimi i tij të mposhtet përmes disiplinës së grupit parlamentar.

Sipas Braçes, modeli “ose voto, ose je jashtë këtij grupi” përbën deformim antidemokratik brenda PS-së. Braçe shpjegon se vendosi të qëndrojë në grupin parlamentar dhe të vijojë punën si deputet, pavarësisht presionit dhe kritikave që thotë se ka përjetuar. Ai thekson se mandatin ia kanë dhënë qytetarët përmes votës dhe se ka një detyrim moral ndaj tyre.