Burg zyrtares trafikante/ Erisa Fero u kap në makinën e saj me 58 kilogramë kanabis

Gjykata e Pogradecit lënë në burg punonjësen e administratës shtetërore, 28-vjeçaren Erisa Fero që u kap duke transportuar 58 kilogramë kanabis.

E njëjta masë u dha dhe për dy bashkëpunëtorët e saj, 32-vjeçarin Likë Basha si dhe adoleshentin 17-vjeçar. Mbi ta rëndon vepra penale “trafikim i lëndëve narkotike” kryer në bashkëpunim.

Seanca u zhvillua me dyer të mbyllura.

Të akuzuarit u kapën të enjten teksa po lëviznin me një makinë tip “Volkswagen” që drejtohej nga e reja Erisa Fero. Ata u ndaluan në qafë thanë pas informacioneve se nëpërmjet zonës së fshatit Lin do të trafikohej lëndë narkotike drejt Maqedonisë së Veriut.

Nga hetimet e kryera rezulton se zyrtarja Erisa Fero së bashku me dy të akuzuarit e tjerë kishin kryer transportin e drogës nga Tirana drejt qafë thanës e më pas ajo do të kalohej drejt shtetit maqedonas nga dy persona të tjerë nga fshati Piskupat i Pogradecit, të cilët janë në kërkim.

Dyshohet se në këtë aktivitet kriminal janë përfshirë dhe dy punonjës të policisë së qarkullimit rrugor.