Çarls Lëklerk, “pole-position” i parë në Bahrein
Formula 1 dhe Kampionati i saj Botëror tashmë ka nisur garimin, ndërsa në mënyrë ekskluzive është duke ardhur në rrjetin e Radio Televizionit Shqiptar. Çmimi i Madh i Bahreinit ishte ngritja e siparit, kurse e shtuna pasdite ka sjellë shumë emocione në tre seritë e garave kualifikuese, apo Pole-Position. E në përfundim të këtyre kualifikueseve, Pole-Position i parë i vitit 2022 i ka takuar pilotit të Ferrarit, Çarls Lëklerk, i cili kronometrin e tij e ka ndalur në 1’30”558.
Piloti nga Monako i Ferrarit është vendosur dhjetë të qindtat përpara kampionit në fuqi të Botës, Mark Verstapen, që makinën e tij të Red Bull e ka ndalur në vendin e dytë duke qenë 6 të mijtat përpara Karl Sainz, i cili në vendin e tretë e mban Ferrarin në podiumin e Pole-Position. Pra ende pa përfunduar zyrtarisht gara e Bahreinit, Ferrari ndodhet në tre vendet e para, ndoshta duke hedhur që tani kandidaturën për të qenë dominuesja e Botërorit të sivjetëm të Formula 1.
Në vendin e katërt Red Bull i Perez, kurse koha e pestë e kualifikueseve i ka takuar britanikut Hamilton thuajse shtatë të dhjetat larg nga vendi i parë. Një rezultat shumë të mirë ka marrë Botas, që në debutimin e tij me Alfa Romeo zë vendin e gjashtë. Një nisje me “malore” për Rasëll dhe Mercedesin e tij, që është vetëm i nënti. Mirë mund të konsiderohet gara për Manjusen dhe makinën e tij Has, ndërsa ishte i shtati. Plotësojnë dhjetëshen e parë të radhës së nisjes në këtë Çmim të Madh të Bahreinit, Alonso dhe Gasli.
Çmimi i Madh i Bahreinit, duke nisur nga ora 16:00, do të vijë të dielën drejtpërsëdrejti në rrjetin e Radio Televizionit Shqiptar si të gjitha garat e këtij viti.
NISJA
Radha e parë
- Charles Leclerc (Ferrari)
- Max Verstappen (Red Bull)
Radha e dytë
- Carlos Sainz (Ferrari)
- Sergio Perez (Red Bull)
Radha e tretë
- Lewis Hamilton (Mercedes)
- Valtteri Bottas (Alfa Romeo)
Radha e katërt
- Kevin Magnussen (Haas)
- Fernando Alonso (Alpine)
Radha e pestë
- George Russell (Mercedes)
- Pierre Gasly (AlphaTauri)
Radha e gjashtë
- Esteban Ocon (Alpine)
- Mick Schumacher (Haas)
Radha e shtatë
- Lando Norris (McLaren)
- Alexander Albon (Williams)
Radha e tetë
- Guanyu Zhou (Alfa Romeo)
- Yuki Tsunoda (AlphaTauri)
Radha e nëntë
- Nico Hulkenberg (Aston Martin)
- Daniel Ricciardo (McLaren)
Radha e dhjetë
- Lance Stroll (Aston Martin)
- Nicholas Latifi (Williams)