Celibashi miraton tabelat përmbledhëse për bashkitë Vlorë dhe Berat, konfirmohet fitorja e Brunilda Mersinit dhe Ervin Cecës të PS-së

Komisioneri Shtetëror i Zgjedhjeve (KSHZ), Ilirjan Celibashi, miratoi të mërkurën në seancë publike Tabelat Përmbledhëse të Rezultateve për zgjedhjet e pjesshme vendore për kryetarë bashkish, të zhvilluara në datën 9 nëntor 2025 në Vlorë dhe Berat.

KSHZ, duke ndjekur procedurat e nenit 123 të Kodit Zgjedhor, konfirmoi fitoren e kandidatëve të Partisë Socialiste në të dyja bashkitë.

Fituesi në bashkinë Vlorë

Në garën për Kryetar të Bashkisë Vlorë, fituese u shpall kandidatja e propozuar nga Partia Socialiste, Brunilda Mersini.

Ajo siguroi një rezultat të thellë, duke marrë 15,672 vota, përkthyer në përqindje 78.44% të votave.

Dionis Sota (kandidat i propozuar nga zgjedhësit, mbështetur nga PD) mori 2,333 vota (11.68%), ndërsa Gjergji Nika (kandidat i pavarur) mori 1,975 vota (9.88%).

Fituesi në bashkinë Berat

Edhe në Bashkinë Berat, rezultati ishte dominues në favor të kandidatit socialist. Fitues u shpall Ervin Ceca nga Partia Socialiste, i cili arriti të marrë 13,050 vota, në përqindje 83.35% e votave. Kandidati kundërshtar Pavlo Shkarpa (Kandidat i propozuar nga zgjedhësit, mbështetur nga PD) mori 2,607 vota (16.65%).

Hapat e mëtejshëm

Miratimi i Tabelave Përmbledhëse të Rezultateve nga Komisioneri Shtetëror i Zgjedhjeve shënon fundin e procesit të numërimit dhe certifikon zyrtarisht rezultatin e zgjedhjeve të pjesshme të 9 Nëntorit 2025 në këto 2 bashki.

Rezultatet u nxorën bazuar në tabelat e rezultateve të dërguara nga çdo KZAZ për zonat zgjedhore përkatëse.

/rtsh.al/