Certifikohen rezultatet e zgjedhjeve parlamentare të 28 dhjetorit në Kosovë
PRISHTINË, 9 shkurt /ATSh/ Komisioni Qendror i Zgjedhjeve (KQZ) i Kosovës ka certifikuar sot rezultatet e zgjedhjeve parlamentare të 28 dhjetorit, duke i hapur kështu rrugë formimit të institucioneve të reja.
Në mbledhjen e mbajtur mbrëmjen e së hënës, KQZ miratoi certifikimin e rezultateve përfundimtare me 11 vota pro.
Lëvizja Vetëvendosje ka dalë e para në zgjedhje, duke fituar 51,10 për qind të votave, duke siguruar 57 deputetë në Kuvend.
E dyta është Partia Demokratike e Kosovës (PDK) e cila ka fituar 20,19 për qind të votave apo 22 deputetë në legjislativ.
Pasohet nga Lidhja Demokratike e Kosovës (LDK) me 13,24 për qind apo 15 deputetë, ndërkaq Aleanca për Ardhmërinë e Kosovës (AAK) ka fituar 5,50 për qind të votave apo gjashtë deputetë.
Nga ulëset e rezervuara për minoritetin serb, nëntë deputetë i ka fituar Lista Serbe, partia më e madhe e serbëve në Kosovë dhe një ulëse Partia për Liri, Drejtësi dhe Mbijetesë e Nenas Rashiq.
Ndërkaq, minoritetet joserbe kanë fituar dhjetë mandate.
/KosovaPress//r.e/