DeSantis e pranon për herë të parë: Trump humbi në 2020, rrezikojmë edhe në 2024 nëse merremi me problemet e tij ligjore

Kandidati republikan presidencial, Ron DeSantis, pranoi përfundimisht se rivali i tij Donald Trump, humbi në zgjedhjet e vitit 2020. Kjo ishte e para njohje e rezultatit që guvernatori i Floridës bëri pas vitesh përgjigjesh të mjegullta dhe të dyshimta.

“Sigurisht që ai humbi,”- tha DeSantis në një intervistë me NBC News të postuar të hënën. “Joe Biden është presidenti.”

DeSantis shpesh ka anashkaluar pyetjet nëse ai beson se rezultatet e zgjedhjeve të vitit 2020 ishin legjitime. Por ditët e fundit ai ka filluar publikisht të vërë në dyshim gënjeshtrat që Trump dhe të aleatëve të tij, që kanë thënë për legjitimitetin e zgjedhjeve.

Zyrtarët federalë dhe shtetërorë të zgjedhjeve dhe vetë prokurori i përgjithshëm i Trump thanë se nuk kishte prova të besueshme se rezultati i zgjedhjeve ishte ndikuar nga mashtrimi. 

Akuzat e ish-presidentit u hodhën poshtë edhe nga gjykatat në atë kohë, duke përfshirë edhe gjyqtarët që ai vetë i kishte emëruar.

Javën e kaluar, Trump u akuzua nga këshilltari special i Departamentit të Drejtësisë, Jack Smith për katër krime që lidhen me përpjekjet e tij për të përmbysur rezultatet e zgjedhjeve të vitit 2020 në prag të trazirave të dhunshme nga mbështetësit e Trump në Kapitolin e SHBA më 6 janar 2021.

Ndryshimi i retorikës së DeSantis ka ardhur teksa ai kërkon të rivendosë fushatën e tij, deri tani të zbehtë të 2024, për në Shtëpinë e Bardhë. 

Trump, i cili mbetet gjerësisht i popullarizuar në bazën e Partisë Republikane, është kandidati kryesor dhe komandues në zgjedhjet presidenciale të GOP vitin që vjen.

DeSantis, në intervistën e tij, në fillim nuk dha një përgjigje të qartë kur u pyet nëse Trump humbi, duke thënë: “Kushdo që vendos dorën mbi Biblën në 20 janar, çdo katër vjet, është fituesi”. 

Por ai dha një përgjigje më të drejtpërdrejtë kur u pyet përsëri. Guvernatori përsëriti shqetësimet e tij në lidhje me metodat e votimit nga zgjedhjet e vitit 2020, duke kritikuar votimin me postë dhe të ashtuquajturën “korrje të votave”, por si republikanët e tjerë ai tha se do t’i pranonte metodat e votimit që ka kritikuar.

“Edhe ne do ta bëjmë. Ne nuk do të luftojmë me njërën dorë të lidhur pas shpine”,- tha DeSantis.

Hulumtimi akademik ka treguar se votimi me postë rrit pjesëmarrjen, por nuk i sjell dobi asnjërës palë. 

“Çështja është, mendoj unë, se njerëzit në media dhe gjetkë duan që të sillemi sikur ato ishin zgjedhjet perfekte. Nuk mendoj se ishin zgjedhje të mbarështruara, por gjithashtu mendoj se republikanët nuk u kundërpërgjigjën, “- tha ai.

DeSantis e ka profilizuar veten në fushatë si dikush që mund të zbatojë më me sukses politikën e Trump. Ai ka ecur në një vijë të lëkundur, por duke kritikuar veprimet e tij.

Muajin e kaluar, ai tha se Trump duhet të kishte ofruar një dënim më të ashpër për sulmin e 6 janarit. Por ai tha gjithashtu se nuk ishte një kryengritje, por një “protestë” që “përfundoi në një mënyrë që ishte për të ardhur keq”.

DeSantis ka argumentuar se republikanët do të humbasin në vitin 2024 nëse fokusohen në zgjedhjet e kaluara dhe problemet ligjore të ish-presidentit, të cilat përfshijnë gjithashtu akuza federale për keqpërdorimin e dokumenteve të klasifikuara, duke përfshirë ato të ruajtura në Mar-a-Lago në një sallë vallëzimi dhe banjë, si dhe hapësira të tjera.

“Nëse zgjedhjet janë një referendum mbi politikat e Joe Biden dhe dështimet që kemi parë dhe ne po paraqesim një vizion pozitiv për të ardhmen, ne do të fitojmë presidencën,”- tha DeSantis për NBC. 

“Nëse, nga ana tjetër, zgjedhjet nuk kanë të bëjnë me 20 janar 2025, por me 6 janar 2021, apo çfarë dokumenti ka mbetur nga tualeti në Mar-a-Lago, nëse është një referendum për këtë, ne do të humbasim.” Apnews

/rtsh.al/