Deklaratat e Kremlinit-Zelensky: Rusia nuk ka vullnet për të përfunduar luftën

Presidenti ukrainas Volodymyr Zelensky ka komentuar deklaratat e fundit të ministrit të Mbrojtjes ruse Andrei Belousov, duke theksuar se ato tregojnë qartë se Kremlini nuk ka dëshirë për të përfunduar luftën, por përkundrazi po planifikon ta intensifikojë atë.

“Sot morëm një sinjal tjetër nga Moska se ata po përgatisin vitin e ardhshëm si vit lufte. Dhe këto sinjale nuk janë vetëm për ne. Është e rëndësishme që partnerët ta shohin këtë, veçanërisht partnerët në Shtetet e Bashkuara të Amerikës, të cilët shpesh thonë se Rusia gjoja dëshiron të përfundojë luftën. Por Rusia po përdor një retorikë krejtësisht të ndryshme – sinjale zyrtare dhe urdhra për ushtrinë e tyre”, u shpreh Zelensky.

Zelenskyy nënvizoi nevojën për reagim.’

“Kjo gjendje shpirtërore e Rusisë duhet parë dhe duhet reaguar ndaj saj. Nëse ata kanë një gjendje të tillë, ata do të minojnë diplomacinë, duke u përpjekur thjesht të mbulojnë dëshirën e tyre për të shkatërruar Ukrainën, ukrainasit, dhe për të legjitimuar vjedhjen ruse të tokave tona me formulime diplomatike dhe presion në pika të ndryshme të dokumenteve. Pastaj ka vende të tjera në Evropë që dikush në Rusi një ditë mund t’i quajë ‘toka historike’ të tyre”, theksoi Zelenky.

Ai shtoi se nevojitet “mbrojtje reale nga kjo histori e çmendur ruse” përmes zgjidhjeve të sigurisë, financiare (përfshirë asetet ruse të ngrira), dhe politike, duke kërkuar guxim nga partnerët për të njohur dhe vepruar sipas së vërtetës.

Deklaratat e Belousov erdhën gjatë një mbledhjeje të zgjeruar të Bordit të Ministrisë së Mbrojtjes ruse më 17 dhjetor 2025, ku ai tha se “detyra kryesore” për vitin e ardhshëm është të ruhet dhe të rritet “ritmi i ofensivës ruse”.

/rtsh.al/