Delvinë, pandemia “falimenton” 15 biznese

Efektet e krizës së shkaktuar nga pandemia po ndihen edhe në bizneset e bashkisë së Delvinës. Që nga fillimi i kësaj gjendjeje e deri tani, administratorët e bizneseve po përballen me vështirësi të shumta ekonomike. Fuqia blerëse ka rënë ndjeshëm në këtë zonë duke shkaktuar edhe mbyllje përfundimtare të disa prej tyre.

Administratorët  shprehen se nuk është aspak e lehtë të përballosh këtë situatë, pasi këto aktivitete , janë e vetmja mundësi për të siguruar  të ardhura për familjet e tyre.

“Ka qenë e vështirë për ne koha e pandemisë. Xhiroja ditore ka qenë shumë e pakët dhe jetesa është e papërballueshme. Fuqi blerëse nuk ka fare edhe pse jemi në prag festash. Shumë subjekte  janë drejt falimentimit edhe ne madje, drejt asaj rruge jemi”, thotë një tregëtar.

“Fuqia blerëse ka rënë , e si pasojë edhe produkte  nuk marrim shumë. Ky është i vetmi biznes nga ku fitojmë të ardhura për familjet tona dhe situata është realisht shumë e vështirë”, shprehet një tjetër administrator.

Shumica e subjekteve në Delvinë janë bar-kafe dhe dyqane ushqimorë .Sipas të dhënave zyrtare nga kjo bashki, që nga fillimi i vitit deri tani, janë mbyllur 15 subjekte dhe janë hapur vetëm 5 të rinj.