Dështon konstituimi i kuvendit në Kosovë, edhe në votimin e gjashtë kandidatja e “Vetëvendosje” nuk mori votat e nevojshme

Ka dështuar me sukses edhe tentativa e gjashtë e deputetëve të Kosovës për konstituimin e Kuvendit këtë të premte.

Ashtu sic pritej, deputetët u mblodhën në sallë me asnjë qëndrim të ri, duke votuar njësoj si të pesta herët e tjera.

Albulena Haxhiu mori sërish 57 vota pro, 47 kundër dhe tre abstenime, të pamjaftueshme për tu zgjedhur.

Vetëvendosja si parti e parë, edhe pse nuk i ka numrat e nevojshëm, këmbëngul në emrin e kandidates që nuk ka mbështetjen e asnjërës nga partitë e tjera, përfshirë edhe disa ligjvënësve nga pakicat.

“Nuk ka asnjë arsye, asnjë person dhe asnjë Grup Parlamentar të refuzojë votën për zonjën Albulena Haxhiu. Është jo vetëm një personalitet i jashtëzakonshëm, por është edhe një person i cili me aktivitetin e saj politik ka dëshmuar përkushtimin e saj për këtë vend. Prandaj, ky është arsyetim falso. Arsyetimi i vërtetë i partive opozitare është që nuk duan ta pranojnë vullnetin e qytetarit”, tha Donika Gërvalla, deputete e Lëvzjes Vetëvendosje.

Opozita bën përgjegjëse Lëvizjen Vetëvendosje që mund ta zhblloojë situatën përmes një marrëveshje apo një emri konsensual.

“Një gjë është e qartë, Albulena Haxhiu nuk kalon. Sikur të donin zgjidhje, kanë pasur mundësi edhe sot, edhe pardje, edhe para katër ditësh. të njëjtën mundësi e kanë edhe pasnesër: Ta ndërrojnë deputetin”, tha kreu i PDK, Memli Krasniqi.

 “Po mendoj që i tërë debati i këtyre ditëve të fundit është shtruar në mënyrë të gabuar, nuk është çështja se a ka ndërruar qëndrim PDK, por a ka ndryshuar qëndrim dhe a ka përpjekje për zhbllokim nga ana e subjektit të parë parlamentar, Lëvizjes Vetëvendosje. Ata duhet ta zhbllokojnë situatës”, tha nënkryetarja e LDK-së, Vlora Çitaku.

Kryetari i Kuvendit dhe nënkryetarët kërkojnë të paktën 61 vota për tu zgjedhur ndërsa pas konstituimit të kuvendit do t’i hapej rruge edhe formimit të qeverisë së re.