Dështon për herë të pestë konstituimi i Kuvendit të Kosovës, zgjedhja e kryetarit shtyhet për 25 prill
Për herë të pestë ka dështuar konstituimi i Kuvendit të Kosovës.
E propozuara për kryeparlamentare të Kuvendit, Albulena Haxhiu nuk ka marrë mbështetjen e mjaftueshme.
Kryesuesi i seancës, Avni Dehari, e ndërpreu atë pas dështimit të zgjedhjes së kryetarit, duke njoftuar se seanca do të vazhdojë të premten, më 25 prill, në orën 11:00.
Në këtë situatë, LVV ka kërkuar mbështetje nga deputetët e pakicave jo-serbe dhe një deputet serb për të arritur shumicën e nevojshme. Megjithatë, ende nuk ka pasur një marrëveshje për formimin e një koalicioni të ri qeverisës. Nëse Kuvendi nuk arrin të zgjedhë kryetarin dhe të formojë një qeveri, mund të shpallen zgjedhje të reja parlamentare.
Kryesuesi i Kuvendit, Avni Dehari njoftoi se Haxhiu ka marrë vetëm 57 vota.
“Në sallë kanë votuar 57 deputetë për, 46 kundër, 3 kanë abstenuar. Në bazë të rezultateve të votimit, nuk kalon kandidatja për kryetare”, tha Dehari.
Nëse seanca e 25 prillit nuk sjell një rezultat, Kuvendi i Kosovës mund të përballet me një krizë institucionale të thellë, e cila mund të kërkojë ndërhyrjen e Presidentes Vjosa Osmani për të shpallur zgjedhje të reja parlamentare
/vizionplus.tv