Drafti për Asocasionin, Meta: Rama, të mos luaj rolin e patronazhistit mbi Kosovën

Kryetari i Partisë së Lirisë, Ilir Meta, e ka vlerësuar si “ndërhyrje të njëanshme dhe jotransparente”, draftin për asociacionin që kryeministri Edi Rama, u ka dërguar ndërkombëtareve, lidhur me zhvillimet më të fundit në Kosovë.

Nëpërmjet një postimi në rrjetin e tij social Facebook, Meta shprehet se Kosova mund të ndihmohet nga Shqipëria vetëm përmes një komunikimi të drejtpërdrejtë e konstruktiv.

Sipas tij, qeveria shqiptare në asnjë rast nuk duhet të flasë apo të propozojë politika që duhen zbatuar brenda Kosovës, pa u konsultuar paraprakisht me kryeministrin Kurti, si dhe institucionet legjitime në Kosovë.

“Situata e krijuar në mes të Serbisë dhe Kosovës mund të ndihmohet nga Shqipëria vetëm përmes komunikimit të drejtpërdrejtë e konstruktiv me institucionet e Kosovës dhe Kryeministrin Kurti. Nuk ka nevojë për ndërhyrje të njëanshme dhe jotransparente, të cilat acarojnë apo përkeqësojnë situatën, e cila paraqitet delikate.”- shkruan Meta.

Sipas tij, Asociacioni i Komunave është një marrëveshje tashmë e pranuar nga qeveria aktuale e Kosovës, dhe ajo garantohet në Marrëveshjen e Brukselit dhe në Aneksin e Marrëveshjes së Ohrit, të realizuara me mbështetjen dhe negocimin e Bashkimit Europian dhe Shteteve të Bashkuara të Amerikës.

“Zgjidhja se si do të arrihet Asociacioni, gjendet pra tek respektimi i Marrëveshjes së Brukselit dhe Ohrit. Kurti ka treguar vazhdimisht përgjegjësi dhe vullnet të palëkundur për zbatimin e Marrëveshjes së Ohrit. Ndërsa tek Vuçiç nuk e kemi parë në asnjë rast një gjë të tillë, përkundrazi një sërë veprimesh të tij kanë demonstruar të kundërtën. Rama, nëse do të donte të luante një rol mund ta bënte këtë, jo duke luajtur rolin e patronazhistit mbi Kosovën, por vetëm duke i kërkuar Beogradit nënshkrimin e marrëveshjeve të Brukselit dhe Ohrit dhe zbatimin e tyre, njohjen e Kosovës nga Serbia dhe heqjen dorë nga strategjia e tensionimit të vazhdueshëm të situatës.”- shkruan Meta.

/rtsh.al/