Durrës, qëllohet me breshëri plumbash autobusi, plagosen dy persona

Dy persona kanë mbetur të plagosur mëngjesin e sotëm si pasojë e të shtënave me armë zjarri.

Ngjarja u shënua rreth orës 7:00 në rrugën e re të Kënetës në Durrës.

Nga hetimet paraprake mësohet se një person i paidentifikuar ka qëlluar me armë zjarri tip automatik, në drejtim të autobusit që transportonte punëtorët drejt ndërmarrjes së rrobaqepësisë  Filanto.

Si pasojë kanë mbetur i plagosur rëndë shoferi i autobusit Albert Gjeçi dhe mjekja Xheni Doka, e cila ka marrë plagë të lehta në krah.

Sipas dëshmitarëve të traumatizuar që kanë parë gjithë skenën, autori i plagosjes, i cili ishte i pajisur me skafandër, pasi ka qëlluar në drejtim të autobusit, është larguar menjëherë nga vendngjarja.

Të plagosurit janë dërguar menjëherë në spital, ku mësohet se gjendja e drejtuesit të mjetit Albert Gjeçi, 47-vjeç lindur në Spitallë dhe banues në lagjen 4 është e rëndë, pasi ai është shtruar me urgjencë në reanimacion, ku i është nënshtruar një ndërhyrje kirurgjikale.

Ndërkohë, mjekja Xheni Doka ndodhet në gjendje më të mirë pasi ka marrë plagë të lehta në krah.

Ende nuk dihen shkaqet e ngjarjes dhe objektivi i të shtënave me armë, ndërkohë policia ka nisur hetimet për kapjen e autorit.