Dyshohet se kreu 4 vjedhje në 2 muaj, arrestohet 31-vjeçari në Durrës! I dënuar edhe më herët për të njëjtën vepër penale

Një 31-vjeçar në Durrës është arrestuar pas dyshimeve se kreu 4 vjedhje në një rrjet supermarketesh të qytetit.

Një 31-vjeçar në Durrës ka rënë në prangat e Policisë, pasi dyshohet se ka kryer 4 vjedhje gjatë dy muajve të fundit.

Përmes një njoftimi, Policia bën të ditur se 31-vjeçari u kap teksa po kryente një tjetër vjedhje në një supermarket.

Po ashtu në njoftim raportohet se 31-vjeçari ka qenë edhe më herët i dënuar për vjedhje.

Ndërkohë materialet procedurale iu referuan Prokurorisë së Durrësit, për veprime të mëtejshme hetimore.

Njoftimi i Policisë:

Durrës/Finalizohet operacioni i koduar “Rrjeti”, për zbardhjen e një sërë vjedhjesh të kryera në një rrjet supermarketesh, gjatë 2 muajve të fundit.

Vihet në pranga 31-vjeçari që kreu 4 vjedhje në këto subjekte.

Ai u kap duke vjedhur në një supermarket, pjesë e të njëjtit rrjet.

31-vjeçari, i dënuar më parë, për të njëjtin krim.

Si rezultat i veprimeve hetimore dhe operacionale, të kryera pas kallëzimit të administratorit të një rrjeti supermarketesh në qytetin e Durrësit, se një shtetas, disa herë, kishte vjedhur produkte, në supermarketet e këtij rrjeti, duke u larguar me vrap, pa paguar, pas kalimit të produkteve, në kasa, shërbimet e Komisariatit të Policisë Durrës finalizuan operacionin “Rrjeti”.

Në kuadër të operacionit, u identifikua, u kap gjatë tentativës për të vjedhur në supermarket, dhe u vu në pranga shtetasi K. M., 31 vjeç, banues në Durrës.

Nga veprimet hetimore dyshohet se ky shtetas, gjatë periudhës 06.11.2025-31.12.2025, ka vjedhur 4 herë, produkte në supermarkete të të njëjtit rrjet, në lagje të ndryshme të qytetit të Durrësit.

Materialet procedurale iu referuan Prokurorisë së Durrësit, për veprime të mëtejshme.