Edi Rama reagon ashpër ndaj protestave të djeshme në Parlament: “Mos e përfshini Shqipërinë në këtë”

Kryeministri Edi Rama ka reaguar me tone të ashpra ndaj kritikave lidhur me zhvillimet në seancën hapëse të Parlamentit, duke e cilësuar si të papranueshme përpjekjen për të justifikuar pengimin e deputetëve për të hyrë në ambientet e Kuvendit si një formë të “kundërshtimit demokratik”.

Në një reagim të drejtpërdrejtë, Rama kritikon atë që e quan “sjellje të neveritshme”, duke iu referuar incidenteve ku, sipas tij, deputetë shqiptarë janë përballur me abuzim verbal dhe dhunë fizike, përfshirë hedhjen e vezëve dhe gurëve, ndërsa përpiqeshin të hynin në vendin e tyre të punës.

“Për llojin tuaj të veçantë të demokratëve dembelë, pengimi i deputetëve për të hyrë në seancën hapëse të Parlamentit qenka ‘kundërshtim’?”, shkruan Rama, duke e shoqëruar reagimin me kritika ndaj atyre që, sipas tij, e shohin situatën vetëm “nga komoditeti i tastierës”.

Kryeministri ndalet gjithashtu te rasti i një deputeteje, të cilën e përshkruan si një akademike të respektuar dhe një aktiviste të njohur për të drejtat e grave. Rama pretendon se ajo është përballur me abuzim teksa përpiqej të mbërrinte në vendin e saj të punës.

Në vijim, Rama vë në pikëpyetje qëndrimin e kritikëve ndaj këtyre veprimeve, duke pyetur nëse shqetësimi për demokracinë “përfundon aty ku fillojnë faktet e pakëndshme”.

Një pjesë e rëndësishme e reagimit të kryeministrit i kushtohet Shqipërisë dhe mënyrës se si, sipas tij, ajo po përfshihet në debatin politik. Rama kërkon që Shqipëria të mos përdoret si argument në këtë përplasje.

“Lëreni Shqipërinë të qetë dhe mos e përfshini Shqipërinë në këtë”, shprehet ai, duke e cilësuar vendin si “vërtet të lirë” dhe “shumë më demokratik” se ajo që e quan politikë “dritëshkurtër”.

Reagimi i Ramës vjen në një klimë të tensionuar politike, ku përplasjet mes mazhorancës dhe opozitës kanë kaluar përtej debatit parlamentar, duke u shoqëruar edhe me protesta dhe incidente jashtë ambienteve të Kuvendit.

Në reagimin e tij, kryeministri e vendos theksin te dallimi mes protestës apo kundërshtimit

REAGIMI I PLOTE

Pra, për llojin tuaj të veçantë të demokratëve dembelë, pengimi i deputetëve që të hyjnë në seancën hapëse të Parlamentit quhet “kundërshtim”?

Ndoshta kështu duket nga rehatia e tastierës suaj. Por, jo për kolegët tuaj shqiptarë, nga e djathta në të majtë, të cilët u detyruan të kalonin mes një korridori sharjesh dhe dhune fizike, me vezë e madje edhe gurë të hedhur ndaj tyre, vetëm që të arrinin në vendin e tyre të punës.

A nuk ju vjen turp të mbështesni një sjellje kaq të neveritshme dhe ta shisni atë si kundërshtim demokratik? Me sa duket, jo.

Meqë ra fjala, shikoni se si një deputete e nderuar, një akademike e respektuar dhe një mbrojtëse gjerësisht e njohur e të drejtave të grave, fyhet dhe keqtrajtohet nga modelet tuaja të “kundërshtimit”, teksa thjesht përpiqet të arrijë në vendin e saj të punës.

Dhe kjo nuk ishte as më e keqja nga ato që kolegëve tuaj shqiptarë iu desh të përballonin dje.

Keni ndonjë gjë për të thënë për këtë formë të veçantë të “kundërshtimit”, nga piedestali juaj i lartë demokratik? Apo shqetësimi juaj për demokracinë përfundon aty ku fillojnë faktet e pakëndshme?

Dhe ju lutem, lëreni Shqipërinë të qetë dhe mos e përfshini në këtë histori. Shqipëria është një vend realisht i lirë dhe shumë më demokratik sesa politika juaj mendjengushtë. Ajo nuk meriton të bëhet çamçakëz në gojët mediokre të njerëzve që i shkëmbejnë faktet me angazhim të lirë politik.