Ekuador, arratiset një lider bande nga burgu, shpërthen dhuna, qeveria shpall gjendje të jashtëzakonshme

Ekuadori u trondit nga një seri sulmesh të martën, duke përfshirë shpërthime dhe rrëmbim të disa oficerëve të policisë, pasi qeveria vendosi një gjendje të jashtëzakonshme pas arratisjes nga burgu së një lideri të fuqishëm bande.

Policia njoftoi se katër oficerë u rrëmbyen të hënën në mbrëmje dhe u zhdukën, një në kryeqytetin, Quito dhe tre në qytetin Quevedo.

Më herët, agjentët arrestuan dy persona për posedim eksplozivi dhe si të dyshuar në të paktën në një nga sulmet në vendin e Amerikës së Jugut.

Qeveria nuk ka thënë se sa sulme janë regjistruar gjithsej, por mediat lokale raportuan disa, duke përfshirë disa në qytetet veriore, ku u dogjën automjete, dhe të tjera në Quito, duke përfshirë një shpërthim pranë shtëpisë së presidentit të Drejtësisë Kombëtare.

Autoritetet nuk kanë thënë se kush mendohet se qëndron pas sulmeve dhe nëse incidentet janë pjesë e një aksioni të orkestruar. 

Qeveria ka akuzuar më parë anëtarët e bandave kryesore të drogës për sulme të ngjashme. Vitet e fundit, Ekuadori është përfshirë nga një valë dhune e lidhur me trafikun e drogës, duke përfshirë vrasjet dhe rrëmbimet.

Autoritetet ekuadoriane raportuan të dielën se Adolfo Macías, i njohur ndryshe si “Fito” dhe kreu i bandës Los Choneros, nuk ishte në qelinë e tij në një burg të sigurisë së ulët. Ai ishte planifikuar të transferohej në një strukturë të sigurisë maksimale atë ditë.

Vendndodhja e tij ishte e paqartë.

Prokurorët hapën një hetim dhe akuzuan dy roje në lidhje me arratisjen e supozuar, por as policia, sistemi i korrigjimeve dhe as qeveria federale nuk konfirmuan nëse Macías iku nga objekti ose mund të jetë duke u fshehur në të.

Në shkurt 2013, ai u arratis nga një strukturë e sigurisë maksimale, por u kap disa javë më vonë.

Të hënën, presidenti Daniel Noboa dekretoi një gjendje të jashtëzakonshme kombëtare për 60 ditë, duke lejuar autoritetet të pezullojnë të drejtat dhe të mobilizojnë ushtrinë në vende si burgjet. 

Qeveria vendosi gjithashtu një shtetrrethim nga ora 23:00 deri në 5 të mëngjesit.

Noboa tha në një mesazh në Instagram se ai nuk do të ndalet derisa “të sjellë paqen për të gjithë ekuadorianët” dhe se qeveria e tij kishte vendosur të përballej me krimin.

Gjendjet e jashtëzakonshme u përdorën gjerësisht nga paraardhësi i Noboas, Guillermo Lasso, si një mënyrë për t’u përballur me valën e dhunës që ka prekur vendin.

Vala e sulmeve filloi disa orë pas njoftimit të Noboas.

Macías, i cili u dënua për trafik droge, vrasje dhe krim të organizuar, po vuante një dënim 34-vjeçar në burgun La Regional në portin e Guayaquil.

Los Choneros është një nga bandat ekuadoriane që autoritetet e konsiderojnë përgjegjëse për një rritje të dhunës që arriti një nivel të ri vitin e kaluar me vrasjen e kandidatit presidencial Fernando Villavicencio. 

Banda ka lidhje me kartelin Sinaloa të Meksikës, sipas autoriteteve.

Ekspertët dhe autoritetet kanë pranuar se anëtarët e bandës praktikisht sundojnë nga brenda burgjeve dhe Macías besohej se kishte vazhduar të kontrollonte grupin e tij nga brenda institucionit të paraburgimit. AP

/rtsh.al/