Emergjenca e energjisë elektrike shtyhet deri më 31dhjetor 2023

Qeveria ka vendosur të shtyjë deri në dhjetor të këtij viti “gjendjen e emergjencës në furnizimin me energji elektrike”.

Në pikën 5, të vendimit nr.584, datë 8.10.2021, të Këshillit të Ministrave, “Për shpalljen e gjendjes së emergjencës në furnizimin me energji elektrike”, të ndryshuar, fjalët “… 30 qershor 2023.” zëvendësohen me “… 31 dhjetor 2023.”, bëhet e ditur në vendimin e qeverisë.

Ky vendim hyn në fuqi menjëherë dhe botohet në “Fletoren zyrtare”.

Në Shqipëri emergjenca në sektorin e energjisë elektrike u shpall në tetor të vitit 2021.

Në atë kohë kryeministri Edi Rama deklaroi se ajo erdhi si pasojë e rritjes së çmimeve në tregjet botërore.

Megjithatë përgjatë kësaj kohe, çmimi i energjisë për familjarët dhe bizneset në Shqipëri mbeti i pandryshuar.

Autoritetet shqiptare vazhdimisht kanë bërë thirrje për kursimin e energjisë elektrike.

Shqipëria e prodhon 99 për qind të energjisë elektrike nga burime të rinovueshme.

Vendi po shikon mundësinë e diversifikimit të prodhimit të energjisë nga dielli dhe nga era.

Një ditë më parë u shpallën fituesit e ankandit të parë të prodhimit të energjisë nga era.

/ rtsh.al /