FMN rikthehet në Shqipëri, në fokus menaxhimi i investimeve publike

Përmirësimi i mënyrës se si Shqipëria planifikon, financon dhe zbaton investimet publike është në fokus të misionit të Fondit Monetar Ndërkombëtar, i cili ka nisur punën në vend.

Ky instrument në kuadër të Fondit Monetar Ndërkombëtar analizon të gjithë ciklin e projekteve, nga planifikimi dhe përzgjedhja deri te zbatimi dhe monitorimi.

Gjatë qëndrimit në Shqipëri, ekspertët e FMN-së po zhvillojnë takime me drejtues të Ministrisë së Financave, ku pritet të shqyrtohen procedurat dhe praktikat aktuale të menaxhimit të investimeve.

Sipas autoriteteve shqiptare, vitet e fundit janë ndërmarrë një sërë reformash për forcimin e këtij procesi, përmes disiplinës fiskale, krijimit të Listës Unike të Projekteve dhe përafrimit të kuadrit ligjor me kërkesat e integrimit në Bashkimin Evropian.

Qeveria vlerëson se problematika si faturat e pashlyera dhe projektet e nisura pa financim të plotë i përkasin së kaluarës.

Me mbështetjen e ekspertizës së FMN-së, synohet përmirësimi i mëtejshëm i eficiencës dhe transparencës së investimeve publike.

Gazetar: Omer Saraçi

/rtsh.al/