FOKUS – EBA i dorëzon Iranit letrën e presidentit Trump

TEHERAN, 12 mars /ATSH-DPA/ – Një këshilltar i presidentit të Emirateve të Bashkuara Arabe dërgoi personalisht një letër nga presidenti amerikan Donald Trump në kryeqytetin iranian Teheran, njoftuan mediat lokale.

Televizioni shtetëror iranian tregoi këshilltarin, Anwar Gargash, duke takuar ministrin e Jashtëm iranian Abbas Araghchi gjatë vizitës së tij në Teheran, të njoftuar vetëm të mërkurën në mëngjes.

Të premten, Trump njoftoi se i kishte shkruar një letër liderit suprem iranian Ayatollah Ali Khamenei për negociatat e mundshme bërthamore.

“Unë u shkrova atyre një letër duke thënë: Shpresoj që ju do të negocioni sepse nëse ne duhet të ndërhyjmë ushtarakisht, do të jetë një gjë e tmerrshme,” theksoi Trump në një intervistë për Fox Business.

Khamenei përsëriti dyshimet e tij për bisedimet me Trump.

“Ne kemi negociuar me vite dhe i njëjti person e ka hedhur nga tavolina marrëveshjen e përfunduar dhe të nënshkruar plotësisht dhe e ka grisur atë copë-copë. Pse duhet të negociojmë?”, shtoi ai. /os/