FOKUS – FMN rrit ndjeshëm parashikimin për rritjen ekonomike të Gjermanisë
Në korrik, FMN-ja parashikonte një rritje ekonomike prej vetëm 0,7 për qind. Për vitin 2027, ekonomistët e institucionit presin që ekonomia gjermane të rritet me 1,1 për qind, ose 0,1 pikë përqindjeje më shumë se parashikimi i mëparshëm.
Shifrat e reja përputhen me parashikimet e publikuara javën e kaluar nga qeveria gjermane. Ministria e Ekonomisë e shpjegoi përmirësimin e perspektivës me qëndrueshmërinë e papritur të ekonomisë së vendit.
FMN-ja rriti lehtësisht edhe parashikimin për ekonominë globale, duke vlerësuar se rritja ekonomike botërore do të arrijë në 3,1 për qind në vitin 2026, nga 3 për qind që parashikohej më parë. Për vitin 2027, institucioni e la të pandryshuar parashikimin në 3,4 për qind.
Sipas FMN-së, ekonomia globale ka treguar një qëndrueshmëri më të madhe ndaj goditjeve të shkaktuara nga çmimet e energjisë.
Rritja e prodhimit të naftës jashtë vendeve të Gjirit, çlirimi i rezervave strategjike dhe dobësimi i kërkesës në Kinë kanë ndihmuar në zbutjen e ndikimit të rritjes së çmimeve të energjisë.
Konflikti mes Shteteve të Bashkuara, Izraelit dhe Iranit ka çuar në bllokimin e Ngushticës së Hormuzit, një korridor jetik për tregtinë globale të energjisë.
Që prej atëherë, vetëm një pjesë e vogël e flukseve të zakonshme tregtare ka kaluar nëpër këtë ngushticë, duke ushtruar presion mbi furnizimet dhe duke rritur ndjeshëm çmimet.
Megjithatë, FMN-ja vlerëson se ndikimi në ekonominë amerikane ka qenë deri tani i kufizuar.
Institucioni e mbajti të pandryshuar parashikimin për rritjen ekonomike të SHBA-së në 2,3 për qind për vitin 2026, ndërsa për vitin 2027 pret një zgjerim po me 2,3 për qind, pak më të lartë se vlerësimi i mëparshëm.
Sipas FMN-së, konsumi i qëndrueshëm i familjeve dhe investimet e fuqishme të kompanive në teknologjitë e reja po mbështesin rritjen ekonomike amerikane. /Ad.Ab./ a.jor.