FOTO/ “Studentët na zgjuan!” – Pamje spektakolare nga Serbia, mijëra njerëz zhvillojnë protestën e fundit para zgjedhjeve Parlamentare: Tiranët do ikin, siç kanë ikur gjithmonë!

Qindra mijëra mbështetës të lëvizjes studentore protestuese në Serbi u mblodhën të enjten në sheshin Slavija, në Beograd, në tubimin përmbyllës të fushatës elektorale, përpara zgjedhjeve të parakohshme parlamentare të së dielës.

Mobilizimi masiv përbën një sfidë të drejtpërdrejtë për presidentin Aleksandar Vuçiç dhe Partinë Progresiste Serbe në pushtet.

Turmat mbushën sheshin qendror të kryeqytetit dhe rrugët përreth, duke valëvitur flamuj dhe brohoritur “Fitore”, në një atmosferë optimizmi përpara votimit të 25 tetorit. Tubimi vjen pas gati dy vitesh protestash të udhëhequra nga studentët kundër qeverisjes së Vuçiçit dhe përqendrimit të pushtetit në duart e tij, shkruan AP.

Mbështetja për lëvizjen studentore është rritur që nga nisja e protestave në nëntor 2024. Sipas sondazheve, lista elektorale e studentëve po konkurron ngushtë me Partinë Progresiste Serbe të Vuçiçit, pavarësisht kontrollit të fortë të shumicës së mediave kryesore dhe institucioneve nga kampi qeverisës.

Studentja e aktrimit Natalija Stepanoviç iu drejtua turmës duke deklaruar se kanë mbetur edhe tri ditë deri në zgjedhje.

“Edhe frika, shantazhi dhe padrejtësia do të kalojnë”, tha ajo, duke shtuar se “tiranët do të ikin, siç kanë ikur gjithmonë, por populli i këtij vendi nuk do të ikë kurrë dhe do të qëndrojë krenar, si një monument i luftës sonë të përbashkët”.

Analistët paralajmërojnë se një rezultat i ngushtë mund ta bëjë të pasigurt përfundimin e zgjedhjeve dhe të hapë rrugën për paqëndrueshmëri pas votimit, nëse të dyja palët shpallin fitoren. Vuçiç, i cili kontrollon policinë, ka paralajmëruar se çdo trazirë pas zgjedhjeve do të shtypet me shpejtësi.

Gjatë dy viteve të fundit, dhjetëra studentë janë ndaluar, ndërsa qeveria ka ndërmarrë masa kundër protestave me synimin për t’i frenuar ato. Në prag të zgjedhjeve, Vuçiç ka zhvilluar një fushatë të ashpër kundër kundërshtarëve të tij, duke akuzuar studentët se financohen nga jashtë për të shkatërruar vendin.

Vëzhguesit ndërkombëtarë të zgjedhjeve dhe Bashkimi Evropian kanë shprehur shqetësim për sigurinë dhe ndershmërinë e procesit zgjedhor. Fushata është shoqëruar me akuza për kontroll pothuajse të plotë të medias nga qeveria, mbikëqyrje dhe sulme kibernetike ndaj aktivistëve, si dhe polarizim të thellë të shoqërisë.

Ndërkohë, Vuçiç zhvilloi të enjten edhe tubimin e tij përmbyllës në një pallat sportiv në një zonë tjetër të Beogradit, ku morën pjesë disa mijëra persona. Ai deklaroi se pret që partia e tij të fitojë me një diferencë prej disa qindra mijëra votash.

Më pas, presidenti serb mori pjesë në një emision radiofonik, përpara një daljeje të planifikuar në transmetuesin publik RTS.

“Do të shohim se cili do të jetë rezultati”, pranoi Vuçiç në Radio Beograd, duke parashikuar një “garë të vështirë dhe të pasigurt”. Ai shtoi se natën e zgjedhjeve “nuk do të ndodhë asgjë e veçantë” dhe se “ata që fitojnë do të festojnë”.

Në garë janë edhe disa parti të vogla, por vëzhguesit vlerësojnë se përplasja mes Vuçiçit dhe lëvizjes studentore mund t’i lërë shumicën e forcave të tjera politike nën pragun zgjedhor prej 3%, të nevojshëm për të hyrë në Parlamentin me 250 vende.

“Për herë të parë pas rreth 30 vitesh ka shpresë. Njerëzit duan ndryshim”, deklaroi Marina Popov Taparicki, nga Beogradi.

Një tjetër qytetar, Igor Zecevic, tha se studentët kanë zgjuar shoqërinë serbe. “Studentët na zgjuan, zgjuan të gjithë në këtë vend. Tani duhet të bëjmë pjesën tonë, të dalim dhe të votojmë”, u shpreh ai.

Sheshi Slavija ishte skena e një proteste të madhe kundër qeverisë edhe në mars, e cila përfundoi me një ndërprerje të papritur. Ekspertët deklaruan më vonë se mund të ishte përdorur një armë zanore kundër demonstruesve paqësorë, pretendim që qeveria e ka mohuar.

Kritikët e akuzojnë Vuçiçin për korrupsion të përhapur, lidhje me krimin e organizuar dhe kufizim të lirive demokratike, veçanërisht të lirisë së medias. Presidenti serb i ka mohuar këto akuza.

Protestat e udhëhequra nga studentët nisën pas dyshimeve për korrupsion në nivele të larta lidhur me projektet e hekurudhave shtetërore. Shkak për zemërimin e qytetarëve u bë shembja e një strehe betoni në stacionin hekurudhor të Novi Sadit, në veri të Serbisë, në nëntor 2024, ku humbën jetën 16 persona.