Fillon bibliotekonomia

Biblioteka Kombëtare e Shqipërisë dhe Biblioteka Kombëtare dhe Universitare e Kosovës, më 8 dhe 9 nëntor, organizojnë në Tiranë Edicionin VII të Konferencës Kombëtare të Bibliotekonomisë me temën “Koleksionet albanologjike në shërbim të historisë së Shqipërisë”, që përkon me fillimin e veprimtarive të planifikuara – në muajin jubilar të nëntorit, me rastin e 100-vjetorit të shpalljes së Pavarësisë së Shqipërisë.

Kjo konferencë, e cila tashmë është tradicionale, është organizim i përbashkët i këtyre dy institucioneve më të rëndësishme të bibliotekonomisë - të Kosovës dhe të Shqipërisë, i mbështetur nga Ministria e Arsimit, Shkencës dhe Teknologjisë e Kosovës dhe Ministria e Kulturës, Turizmit, Rinisë dhe Sporteve e Shqipërisë.

Këtë Konferencë me referimet e tyre e hapën dy drejtorët e institucioneve më të larta të bibliotekarisë në Shqipëri dhe Kosovë, Aurel Plasari dhe Sali Bashota.

Gjatë kësaj konference pritet të iniciohen ide, tema e projekte, që hapin rrugë në rrjedhat dhe në zhvillimet e kulturës e të koleksioneve nacionale, si një sprovë promovuese që ka të bëjë me prekjen e strukturave të dokumentimit dhe të informimit në fushën albanologjike.

Gjatë dy ditëve të konferencës, do të ketë një sërë kumtesash e diskutimesh të rëndësishme për problemet që lidhen me konceptet dhe përmbajtjet bazë të koleksioneve albanologjike.