Fyle: Marrëveshja Kosovë-Serbi të mos mbetet në letër

Marrëveshja e arritur në Bruksel duhet të zbatohet, dhe jo të mbetet në letër. Ky është mesazhi që Komisionari për Zgjerim i BE-së, Stefan Fyle u ka dërguar Prishtinës dhe Beogradit zyrtar.

Fyle gjatë një interviste për gazetën serbe Kurir ka deklaruar se marrëveshja e Brukselit është një marrëveshje e ekuilibruar që hap rrugën për një të ardhme më të mirë për Serbinë dhe Kosovën.

Ai theksoi se zbatimi i marrëveshjes së arritur do të sjell ndryshim të madh në marrëdhëniet mes dy shteteve.

Marrëveshja ka dërguar një mesazh të fortë në Evropë në gatishmërinë e të dyja palëve për të kapërcyer konfliktin e së kaluarës. Ajo gjithashtu pasqyron vendosmërinë, guximin dhe gatishmërinë për kompromis. Dituria është aftësia për të shikuar kah e ardhmja, në më shumë se një raund të zgjedhjeve. Këto janë të gjitha virtytet evropiane, deklaroi Fule.

Sipas Fyles, caktimi i datës për nisjen e negociatave për antarësim të Serbisë në BE, varet nga zbatimi i planit të marrëveshjes.

Shpresoj që shtetet anëtare të BE-së në vendimin e tyre do të ndjekin rekomandimet tona, shtetet anëtare do të shikojnë efektet e një marrëveshje midis Beogradit dhe Prishtinës, tha ndër të tjera Fule.