Rusia publikon emrin e shefit të CIA-s në Moskë

Rusia ka publikuar identitetin e shefit të CIA-s në Moskë, një lëvizje që shihet si shkelje e protokollit diplomatik.

Rusia thotë se ka paralajmëruar zyrtarin në fjalë në vitin 2011 që të ndalë rekrutimet provokuese të spiunëve.

Një burim i rezervuar qeveritar tha për agjencinë e lajmeve Interfax se, nëse rekrutimi vazhdon FSB do të ndërmarrë aksione analoge ndaj oficerëve të CIA-s.

Njoftimi vjen pas vendimit të Moskës zyrtare për të dëbuar diplomatin amerikan Ryan Fogle, i cili akuzohet se është përpjekur të rekrutojë një oficer të shërbimeve sekrete ruse për të spiunuar në favor të SHBA-ve.

Ai thuhet se ka qenë sekretari i tretë në ambasadën amerikane në Moskë dhe tani është shpallur person non grata për atë që Ministria e Jashtme ruse e quan veprim provokues njësoj si në luftën e ftohtë.

Fogle u arrestua të martën dhe është urdhëruar të largohet nga Rusia, por ende nuk dihet nëse e ka bërë këtë apo jo.

Autoritetet ruse thanë se zoti Fogle u arrestua teksa përpiqej të rekrutonte një agjent të anti-terrorit të FSB-së në rajonin e Kaukazit.

Uashingtoni ka refuzuar të komentojë publikimin e identitetit të shefit të CIA-s në Moskë. Gjithësesi, qeveria amerikane shprehet optimiste për një bashkëpunim të mundshëm me Rusinë.