Gazment Bardhi: BE i vendos 34 kushte Shqipërisë, pengesa për integrimin është Edi Rama

Opozita ka reaguar ashpër ndaj kushteve të vendosura nga Bashkimi Europian në kuadër të negociatave të anëtarësimit të Shqipërisë, duke akuzuar kryeministrin Edi Rama se po pengon procesin e integrimit europian të vendit.

Në deklaratë thuhet se për mbylljen e negociatave vetëm për Grupkapitullin e Themeloreve, BE-ja i ka vendosur Shqipërisë 34 kushte, të cilat lidhen me korrupsionin, funksionimin e institucioneve demokratike dhe standardet zgjedhore.

Sipas opozitës, një nga arsyet kryesore të këtyre kushteve është vendimi i mazhorancës për të mbrojtur në Parlament zëvendëskryeministren Belinda Balluku, duke i garantuar asaj “imunitet nga arrestimi i SPAK-ut”.

Në reagim theksohet se Bashkimi Europian ka shprehur “keqardhje” për vendimin e Kuvendit dhe i ka kërkuar Shqipërisë të zbatojë standardet europiane mbi imunitetin parlamentar.

Deklarata nënvizon gjithashtu se në dokumentet zyrtare të BE-së, korrupsioni cilësohet si “shqetësim vendimtar”, ndërsa për herë të parë sektori i ndërtimit identifikohet si kanal për pastrimin e parave përmes transaksioneve jofinanciare.

Opozita pretendon se Bashkimi Europian ka evidentuar edhe rrjetet e patronazhimit si problematikë për procesin zgjedhor në Shqipëri, duke kërkuar zgjedhje plotësisht në përputhje me standardet e OSBE/ODIHR-it.

Në deklaratë përmendet edhe kërkesa e BE-së për “mbikëqyrje efektive dhe të papenguar parlamentare, përfshirë komisionet hetimore”, si dhe zbatimin e vendimeve të Gjykatës Kushtetuese.

“Grupkapitulli i Themeloreve hapet i pari dhe mbyllet i fundit. Por pa mbyllur kapitullin e Edi Ramës, Shqipëria nuk i mbyll dot negociatat”, thuhet në fund të reagimit të opozitës.