Gjermani–Francë, marrëdhëniet e dy shteteve dobësohen ndërsa krizat rriten
Askush nuk e thotë me zë të lartë, por marrëdhëniet gjermano-franceze janë ndoshta në pikën më të keqe të viteve të fundit. Sot, megjithëse njeriu që në vitin 2018 bëri thirrje për “më shumë bashkëpunim” mbi bazën e propozimeve të presidentit francez për të ardhmen e Bashkimit Evropian është në kancelarinë gjermane, klima është “ftohtësisht profesionale”, siç e përshkruan një diplomat gjerman në Bruksel. Dy qeveritë nuk bien dakord për vendosjen e një tavani evropian për çmimet e gazit natyror. Parisi po kërkon vendime më të guximshme, veçanërisht përballë masave kombëtare prej 300 miliardë eurosh të shpallura nga qeveria federale, të cilat i sheh si një avantazh të padrejtë ndaj bizneseve gjermane. Përveç kësaj, Franca preferon të investojë në energjinë bërthamore dhe burimet e rinovueshme dhe as nuk dëshiron të dëgjojë për tubacionin spanjoll-francez, një projekt që e braktisi në 2019 dhe tani gjermanët duan ta ringjallin.
Së fundmi, Berlini shpalli një program të mbrojtjes kundërajrore (European Sky Shield Initiative) së bashku me 13 vende anëtare të NATO-s, pa konsultim paraprak me Parisin. Gjermanët do të përdorin sisteme vendase, amerikane dhe ndoshta izraelite, ndërsa francezët po përgatisin mburojën e tyre, në bashkëpunim me Italinë dhe, kuptohet, të shqetësuar për krijimin e vendeve “satelite” gjermane në Evropën Lindore, në një kohë kur ata vetë dhe ata nuk kanë arritur të bëjnë të njëjtën gjë në Jug dhe po shqyrtohen për një qëndrim “të paqartë” ndaj Rusisë.
Megjithatë, dallimet mes Berlinit dhe Parisit nuk mbarojnë këtu dhe, siç pritej, përfshijnë edhe ekonominë. Emmanuel Macron prej kohësh kërkon një rishikim të arkitekturës fiskale të Evropës, nën peshën e rritjes së kostove të energjisë, por edhe të pasojave të pandemisë. Por Gjermania i tha “jo” gjithçkaje, si në huamarrje ashtu edhe në mendime për një ridizajnim thelbësor të Paktit të Stabilitetit dhe Rritjes që kujdeset për disiplinën fiskale në Eurozonë.
Vizita e Scholz në Kinë
Vizita e kancelarit Scholz në Kinë, vetëm disa ditë pasi Xi Jinping u rikonfirmua si lider i Partisë Komuniste, bëri pak për të lehtësuar grindjen dhe u kritikua brenda dhe jashtë Gjermanisë. Emmanuel Macron kishte propozuar vizitën e përbashkët, si pjesë e një strategjie evropiane kundër Pekinit.
Anulimi i këshillit drejtues gjermano-francez
Më 26 tetor do të zhvillohej këshilli qeveritar gjermano-francez, me krerët dhe shumicën e ministrave të çdo qeverie që do të mblidheshin në Fontainebleau për të shpallur unitetin e tyre dhe stabilitetin e boshtit të përbashkët. Në vend të kësaj, takimi u anulua (për herë të tretë këtë vit) pesë ditë më parë dhe u reduktua në një takim midis Macron dhe Soltz në Elysee.
Pavarësisht listës së tyre të gjatë të dallimeve, Gjermania dhe Franca definitivisht kanë ende më shumë interesa që i bashkojnë ato, dhe shanset janë që ata përfundimisht ta gjejnë gjuhën e përbashkët. Në çdo rast , gjëja e fundit që i duhet Evropës tani është ndarja e brendshme./ CNN.gr
/rtsh.al/