Gjirokastra, e preferuara e italianëve – 30 turistë nga Palermoja ndalojnë në qytetin historik

Turistët nga Italia janë ndër atyre që dominojnë në qytetin e gurtë të Gjirokastrës.

Së fundmi, një grup prej 30 vizitorësh nga Palermoja ka mbërritur në Gjirokastër, si pjesë e një turi të organizuar në disa prej destinacioneve më të njohura të Shqipërisë.

Vizitorët italianë janë tërhequr nga arkitektura unike e Gjirokastrës, ku shtëpitë prej guri dhe rrugicat e ngushta ruajnë origjinalitetin e tyre.

“Është hera e parë që vijë në Shqipëri. Miku im Mario ma propozoj në fund të vitit të shkuar. Që nga ajo kohë u bëra kureshtar për ta prenotuar. E konfirmoj atë që më pati thënë shoku im, pasi këtu është çdo gjë e bukur. Kam ngelur shumë i mahnitur.”

“Punimi me gurë na ka bërë shumë përshtypje. Duke u ndërthurur mes rrugicave me kalldrëm dhe banesave duket mrekullueshëm. Shtëpitë këtu janë shumë të ndryshme nga shtëpitë në vendin tonë.”

Lorenzo, udhërrëfyesi i grupit, ka gati trembëdhjetë vite që sjell turistë italianë në Shqipëri. Ai tregon si interesi për Gjirokastrën është i lartë dhe po shihet gjithnjë e më shumë si një destinacion autentik dhe i paeksploruar plotësisht.

“Sot kemi një ekskursion në Gjirokastër. Kemi një drekë dhe kuzhinë tradicionale, traditë shqiptare. Do të vizitojmë kalanë, shtëpi autoktone,” thotë udhërrëfyesi italian.

/rtsh.al/