Gjykata Speciale zgjat paraburgimin për Thaçin: Ekziston rreziku se mund të ndikojë te dëshmitarët

Dhomat e Specializuara të Kosovës në Hagë kanë vendosur të zgjasin afatin e paraburgimit për ish-presidentin Hashim Thaçi. Vendimi u mor më 5 gusht, me arsyetimin se ende ekziston rreziku që ai të pengojë procedurat gjyqësore ose të ndikojë tek dëshmitarët.

Në vendim thuhet se gjykata ka arsye të besojë se Thaçi mund të arratiset, të pengojë përparimin e procesit dhe të kryejë vepra të tjera penale.

“Duke pasur parasysh sa më sipër, Gjyqtari i Procedurës Paraprake konstaton se, deri më sot, ka arsye të artikulueshme për të besuar se Z. Thaçi mund të arratiset, të pengojë përparimin e procedurave të Gjykatës së Lartë dhe të kryejë vepra të mëtejshme penale, duke bërë kështu të domosdoshme ndalimin e vazhdueshëm të Z. Thaçi. Gjyqtari i Procedurës Paraprake mbetet i mendimit se asnjë kusht nuk mund të zvogëlojë, në këtë fazë, rreziqet ekzistuese, në veçanti rrezikun që i akuzuari të pengojë përparimin e procedurave të Gjykatës së Lartë ose të kryejë vepra të mëtejshme penale. Z. Thaçi mund të përdorë persona të tjerë, ose të përdorë pajisje komunikimi që u përkasin personave të tjerë, ose t’u kërkojë personave të tjerë të përdorin pajisjet e tyre me qëllim ndërhyrjen e paligjshme te dëshmitarët. Për arsyet e lartpërmendura, Gjyqtari i Procedurës Paraprake urdhëron vazhdimin e paraburgimit të Z. Thaçi”, thuhet në njoftimin e Gjykatës Speciale.

Hashim Thaçi ndodhet në paraburgim në Hagë prej 5 vitesh, i akuzuar për krime lufte dhe krime kundër njerëzimit gjatë luftës në Kosovë (1998–1999). Në dhjetor 2024, ndaj tij u ngrit edhe një aktakuzë e dytë për pengim të drejtësisë.

/rtsh.al/