Gjysmëfinalet e Euro U-17 në RTSH/ Belgjika sfidon Francën për të prekur finalen e parë historike

Pas fazës në grupe Euro 2025 për moshat deri në 17 vjeç ka hyrë në një fazë delikate ku katër ekipet do të vendosin ditën e sotme se cilat skuadra do të luajnë në finalen e madhe më 1 qershor në “Arenën Kombëtare”.

Gjysmëfinalja e parë në program është ajo e orës 18:00 mes Francës dhe Belgjikës, takim ky që do të transmetohet për publikun shqiptar në ekranin e RTSH 1 HD.

Franca siguroi një vend mes katër më të mirave të kompeticionit për herë të katërt në pesë edicionet që është organizuar Europiani i moshave deri në 17 vjeç. Përballë Belgjikës ekipi në fjalë do të tentojë finalen e katërt pasi ka arritur që të luajë plot tri të tilla më parë duke e fituar edhe një herë turneun në 2022-in. Sa i përket Belgjikës hera e fundit që ka qenë në gjysmëfinale daton në 2018-ën kur u mund 2-1 përballë Italisë. Ekipi në fjalë nuk ka qenë kurrë pjesë e një finaleve të këtij eventi dhe do të ketë sot një shans të artë për ta arritur nëse kalon një pengesë të vështirë siç është Franca.