Greva në burgje, mbi 500 të burgosur refuzojnë ushqimin

Greva e urisë në burgje ka marrë përmasa shqetësuese. Panorama raporton se janë mbi 500 të burgosur që kanë refuzuar ushqimin.

Burgjeve të Shënkollit, Fushë Krujës dhe Peqinit i janë bashkuar edhe burgu i Drenovës në Korçë dhe burgu i Rrogozhinës.

Të burgosurit thonë se do e përshkallëzojnë protestën e tyre, pasi deri më tani kanë vepruar në mënyrë paqësore, duke respektuar rregulloren e burgut.

Shkak për protestën e tyre është bërë amnistia e qeverisë.

Të burgosurit kërkojnë që vitet e falura të mos jenë një, por dy.

Ata kërkojnë edhe zgjerimin e listës së veprave penale të cilat përfitojnë falje. Sipas tyre, falen ata që kanë bërë plagosje të rënda me dashje, por nuk falen ata që kanë shkelur rregullat e qarkullimit rrugor.

Të burgosurit kërkojnë edhe të drejtën e lirimit me kusht pas kryerjes së tre të katërtave të dënimit.

Po ashtu ata duan edhe aplikimin e shërbimit të provës për disa kategori të dënuarish.