Hague-Thaçit: Plan për integrimin e veriut

Kryeministri Hashim Thaçi është takuar sot me sekretarin për Punë të Jashtme të Mbretërisë së Bashkuar, William Hague, me të cilin ka biseduar për marrëdhëniet e shkëlqyera mes dy vendeve, si dhe për integrimin e Kosovës në Bashkimin Evropian dhe për procesin e reformave të gjithëmbarshme në Kosovë, thuhet në një njoftim të Zyrës së Kryeministrit.

Thaçi e njoftoi Hague me punën që është bërë nga Qeveria për të realizuar të gjitha obligimet që dalin nga agjenda e integrimit evropian të Kosovës, duke ndërmarrë të gjitha reformat strukturore në ekonomi, politikë dhe legjislacion.

Kryeministri shprehu vendosmërinë e Qeverisë për forcimin e qeverisjes së mirë, efikase, transparente, thellimin e përkushtimeve për zbatimin e vizionit për zhvillimin e qëndrueshëm ekonomik, rritjen e mirëqenies sociale të qytetarëve, si dhe në veçanti përkushtimet institucionale për respektimin afirmativ të të drejtave të komuniteteve dhe forcimin e bashkëpunimit rajonal.

Kryeministri ritheksoi se dialogu mes Kosovës dhe Serbisë mund të vazhdojë vetëm pasi që marrëveshjet e arritura të nisin të implementohen.

Nga ana e tij, Hague e ka siguruar kryeministrin Thaçi që Mbretëria e Bashkuar do të vazhdojë të mbështesë shtetin e pavarur dhe demokratik të Kosovës, sidomos në rrugën për t`u bërë anëtare e BE-së.

Hague vlerësoi progresin e Kosovës dhe kërkoi nga kryeministri Thaçi të vazhdojë reformat e nevojshme, sidomos në gjetjen e një plani për integrimin e komunitetit serb që jeton në veri të vendit.

Sekretari Hague e mirëpriti progresin e arritur në dialogun Kosovë-Serbi dhe theksoi rëndësinë e vazhdimit të këtij dialogu, në mënyrë që të dy vendet fqinje të kenë mundësi të arrijnë progres drejt anëtarësimit në BE, thuhet në fund të komunikatës së Kryeministrisë.