Hamasi liroi Gilad Shalitin

Hamas u ka dorëzuar ndërmjetësve egjiptianë ushtarin izraelit, Gilad Shalit, pas pesë vjet pengmarrje, në kuadër të marrëveshjes për shkëmbimin e të burgosurve me Izraelin.

Lajmin e kanë bërë të ditur drejtues të Hamas.

Mbi 1 mijë të burgosur palestinezë do të lirohen në kuadër të marrëveshjes, nga të cilët 477 kanë filluar të lirohen të martën.

Rreshteri Shalit u rrëmbye në vitin 2006 nga militantët e Hamasit, të cilët hynë përmes një tuneli në Izrael. Ditën e hënë, gjykata Supreme e Izraelit rrëzoi një peticion të familjarëve të viktimave të sulmeve të militantëve për të shtyrë shkëmbimin.

Shalit, 25 vjec, është pranuar në kalimin e Rafahut mes Gazës dhe Egjiptit, duke iu dorëzuar negociatorëve egjiptianë, nën mbikëqyrjen e zyrtarëve izraelitë.

Më vonë ai u transferua në kalimin Kerem Shalom, mes Egjiptit dhe Izraelit.

Pasi u ka bërë një telefonatë prindërve dhe i është nënshtruar një kontrolli mjekësor, rreshteri do të fluturojë me helikopter në bazën ajrore Tel Nof, në Izrael.

Në të njëjtën kohë, 477 të burgosurit e parë palestinezë kaluan në Egjipt nga kalimi Kerem Shalom, pas një udhëtimi 10-minutash nga Rafahu.

Marrëveshja për lirimin e Shalit u arrit më 11 tetor.

Ajo u komunikua nga vetë kryeministri izraelit Benjamin Netanyahu.