Hapet Urgjenca e re Polivalente në QSUT, Manastirliu: 100% funksional me standarde evropiane

Urgjenca e re Polivalente, ka filluar funksionimin e saj me kushte optimale, duke e bërë atë plotësisht funksionale. Teksa pa nga afër Ministrja e Shëndetësisë Ogerta Manastirliu u shpreh se tashmë kjo urgjencë i ka hapur dyert për të pritur pacientët, ndërsa shtoi se është shtuar numri i infermierëve dhe mjekëve për një shërbim sa më të mirë dhe të shpejtë.

“Jemi të kënaqur që kemi arritur këtë standard që tashmë bëhet funksional i gjithë Spitali Qendror. Me integrimin e urgjencës Polivalente që e kishim lënë në fazën e fundit hyrjen dhe funksionimin e saj pikërisht për arsye se donim që të 14 shërbimet të ishin të integruara së pari në këtë spital të fillonte puna dhe me Urgjencën Polivalente që tashmë i ka hapur dyert po pret dhe trajton pacientë.

Ne kemi arritur në 100% të shfrytëzimit të kapaciteteve  të këtij spitali. Urgjenca Polivalente në QSUT pret rreth 100 mijë në vit, pra kemi një fluks të madh pacientësh. Është një urgjencë që ka kapacitete të mjaftueshme për nga pikëpamja e organizimit strukturor. Ajo që ne kemi vendosur është që të shtojmë numrin e infermiereve dhe të mjekeve në urgjencë  në mënyrë që ne të kemi një rritje të kapaciteteve përsa i përket  burimeve njerëzore”, tha ministrja. 

Në bashkëbisedim me mjekët e shërbimit të urgjencës, ministrja Manastirliu foli për riorganizimin e shërbimit dhe përmbylljen e ciklit të ofrimit të shërbimit për qytetarët brenda një strukture spitalore, siç është spitali ultramodern që ka hapur dyert në qendrën më të madhe spitalore në vend.

“Tani ndiqen rregullat e triazhimet sipas kodeve të përcaktuara dhe këtu lehtësia është maksimale sepse janë bokse të përcaktuara, kemi të gjitha aparaturat e shtuara si në kapacitete të tilla, që monitorimi edhe ekzaminimet të bëhen në kohë reale dhe sigurisht më pas rrugëtimi i pacientit brenda strukturës spitalore, i cili do të ndiqet nga ju si mjekë, por edhe nga mjekët e shërbimit të gjithë spitalit qendror që ne e kemi në të njëjtën godinë dhe kjo është një lehtësi e madhe”, tha Manastirliu.

Duke folur për trajtimin e urgjencave kardiake, Manastirliu nënvizoi se, shërbimi i Hemodinamikës në QSUT, në Spitalin Qendror dhe në Spitalin “Shefqet Ndroqi” në koordinim me Urgjencën Kombëtare, do të trajtohen më së miri.

“Që në momentin që një suspekt akut i infarktit të miokardit niset, lajmërohet Urgjenca Kombëtare dhe lajmëroheni dhe ju, kombinimi dhe organizimi me Urgjencën Kombëtare, me Urgjencën Polivalente, e njëjtë edhe me Urgjencën e Senatoriumit tani, që do të hapë edhe shërbimin 24 orë për ditët e hëna edhe deri në drekë çdo ditë, besoj që kjo do ta përmirësojë punën në të gjithë aspektet”, nënvizoi Manastirliu.

Transferimi i shërbimeve drejt spitalit të ri është përmbyllur me transferimin e Shërbimit të Urgjencës Polivalente, e cila do të ofrojë shërbim me standarde bashkëkohore për pacientët. Urgjenca Polivalente në QSUT pret rreth 100 mijë pacientë në vit.

Spitali Qendror, ultramodern, tashmë do të ofrojë kujdes shëndetësor me 14 shërbime mjekësore spitalore të specializuara si kardiologjia, nefrologjia, hematologjia, gastrohepatologjia, mjekësia interne, endokrinologjia, dermatologjia, reumatologjia, alergologjia, urgjenca dhe imazheria me kapacitet 345 shtretër.

Spitali Qendror, i vendosur në funksion 100 % për pacientët dhe stafet mjekësore, është vepra më e madhe infrastrukturore në shëndetësi në 30 vitet e fundit.

/rtsh.al/