Haxhic, Fyle: Serbia të arrijë standardet për BE

Zyrtarët e Bashkimit Evropian e kanë mirëpritur arrestimin e të akuzuarit për krime lufte në ish-Jugosllavi, Goran Haxhic, duke e quajtur një hap të rëndësishëm për Serbinë në realizimin e perspektivës evropiane.

Megjithatë, komisionari për zgjerim i Bashkimit Evropian, Shtefan Fyle, i ka thënë Radios Evropa e Lirë se Serbia duhet të shënojë përparim në lirinë e mediave, sundimin e ligjit dhe në transparencën politike, para se të bëhet kandidate për anëtarësim.

Pas dërgimit të Mlladicit në Hagë dhe kapjes së Haxhicit, po, Serbia është më afër Bashkimit Evropian. Por, nëse më pyesni: a do të thotë kjo për Serbinë që mund të largohet nga lista e gjërave që duhet ti bëjë? Jo, ka thënë Fyle.

Autoritetet serbe kanë njoftuar se kanë arrestuar Haxhicin në rajonin e Frushka Gorës.