Helmimi i 56 studentëve të Akademisë së Sigurisë, AKU: Bllokohen mbi 150 kg ushqime dërgohen për ekzaminim

Autoriteti Kombëtar i Ushqimit ka reaguar pas rastit të dyshuar të helmimit ushqimor në Akademia e Sigurisë, ku 56 studentë përfunduan në spital.

Sipas njoftimit zyrtar të AKU-së, menjëherë pas marrjes së informacionit janë kryer kontrolle në subjektin e kateringut “SORI-AL”, i cili furnizonte Akademinë me ushqim të gatshëm të prodhuar në ambientet e Garnizonit “Skënderbej” në Tiranë.

Gjatë inspektimit në kuzhinën brenda Akademisë së Sigurisë, inspektorët konstatuan se nuk kryhej gatim në vend, ndërsa ushqimet silleshin të gatshme nga kompania e kateringut. Në momentin e kontrollit u gjetën pilaf, makarona, fasule, sallam dhe kos të hapur për shërbim.

AKU bëri të ditur se u bllokuan 85.9 kilogramë produkte ushqimore dhe u morën mostra për analiza mikrobiologjike pranë laboratorit të ISUV. Ndaj subjektit u vendos gjithashtu një gjobë prej 100 mijë lekësh për mungesë të sistemit të plotë të gjurmueshmërisë së produkteve.

Kontrolle të mëtejshme u ushtruan edhe në ambientet e kompanisë “SORI-AL” pranë Garnizonit “Skënderbej”, ku u sekuestruan edhe 67.3 kilogramë produkte ushqimore si dhe 1350 kokrra vezë. Edhe në këtë rast, AKU vendosi një tjetër gjobë prej 100 mijë lekësh për shkelje të gjurmueshmërisë ushqimore.

Ndërkohë, policia ka arrestuar kuzhinierin dhe një teknologe ushqimi të kompanisë së kateringut, ndërsa është shpallur në kërkim administratorja e kompanisë, shtetasja me iniciale A.T., 52 vjeçe.

Njoftimi i plotë i AKU-së

Autoriteti Kombëtar i Ushqimit në funksion të informimit publik dhe transparencës bën me dije se, nëpërmjet një komunikimi ndërinstitucional me Akademinë e Sigurisë në Sauk ka marrë informacion për dyshim helmimi të disa kursantëve pranë kësaj akademie.

Menjëherë nga AKU janë kryer verifikimet përkatëse në subjektin SORI-AL, subjekt i cili ushtron veprimtarinë e catering-ut pranë këtij institucioni, ushqim që vjen i gatshëm prodhuar në ambientet e garnizonit “Skërnderbej” pranë Akademisë së Forcave të Armatosura Tiranë.

Sipas kontrollit të ushtruar të ambientet e kuzhinës së vendosur brenda ambienteve të Akademisë së Sigurisë, u konstatua se subjekti ushtron aktivitetin në kushte higjieno-sanitare të përshtatshme.

Nga verifikimi në moment kontrolli rezulton që në këtë  ambient nuk kryhet proces gatimi, produktet vinin të gatshme catering nga subjekti SORI-AL, prodhuar në ambientet e kuzhinës së “Garnizoni Skënderbej”, Tiranë.

Më konkretisht në moment kontrolli u konstatua pilaf, makarona, fasule, sallam dhe kos i hapur gati për shërbim, nga të cilat u bllokuan 85.9. kg produkt dhe u mor mostër për analizim mikrobiologjik, që u dërguan pranë laboratorit të ISUV.

Për mungesë të një sistemi funksional dhe të plotë gjurmimi ndaj subjektit u vendos masë administrative me gjobë në vlerën e 100 mijë lekëve.

Në vijim të ndjekjes së gjurmueshmërisë u krye kontroll edhe në ambientet e subjektit SORI-Al me adresë “Garnizoni Skënderbej” pranë Akademisë së Forcave të Armatosura, ku u konstatua se OBU nuk u gjet në proces pune pasi prodhimi kryhet në orare të caktuara.

Në subjekt nuk u konstatua produkt i gatshëm për konsum, pasi produktet e prodhuara shpërndahen menjëherë tek pikat kontraktuese.

Për qëllim të inspektimit në subjekt janë marrë mostra për produktet e konstatuara dhe më konkretisht djathë i bardhë lope, kos lope, vezë, sallam për analizim të ngarkesave mikrobiologjike të cilat u dërguan pranë laboratorit të ISUV.

U bllokua sasia gjendje prej 67.3 kg produkte,1350 kokrra vezë, dhe ndaj subjektit u vendos masa administrative me gjobë për mungesë të sistemit të plotë të gjurmueshmërisë në vlerën e 100 mijë lekëve.

Autoriteti Kombëtar i Ushqimit do të vijojë me ndjekjen hap pas hapi të gjithë procesit dhe marrjen e masave në vijim me qëllim garantimin e sigurisë ushqimore.

/rtsh.al/