Hoxhaj vizitë zyrtare në Shqipëri

Me ftesë të ministrit të Punëve të Jashtme të Republikës së Shqipërisë, Edmond Panariti, sot po qëndron për një vizitë zyrtare në Tiranë, ministri i Punëve të Jashtme i Republikës së Kosovës, Enver Hoxhaj.

Gjatë qëndrimit në Shqipëri, ministri Hoxhaj, përveç takimit me homologun Panariti do të zhvillojë takime edhe me liderët e tjerë kryesorë institucionalë e politikë të Republikës së Shqipërisë.

Ministri Hoxhaj do të takohet me presidentin Bujar Nishani, kryeministrin Sali Berisha, kryetaren e Kuvendit, Jozefina Topalli si dhe me liderët e partive politike e përfaqësues të jetës akademike e shoqërore në Shqipëri.

Dy ministrat e jashtëm, Hoxhaj e Panariti do të nënshkruajnë edhe një protokoll bashkëpunimi, i cili pritet të ketë rezultate të rëndësishme në avancimin e mëtutjeshëm të marrëdhënieve bilaterale dhe shkëmbimeve ndërmjet dy shteteve tona./Indeksonline/