Humbjet në koshere për shkak të spërkatjeve- Bletërritësit në Konispol të shqetësuar, bashkia merr masa

Bletërritësit në Konispol po përballen me një fenomen shqetësues gjatë kësaj periudhe. Spërkatjet e agrumeve me pesticide po shkaktojnë dëme të mëdha në kosheret e bletëve, duke sjellë humbje të konsiderueshme.

Sipas specialistëve të bujqësisë kjo situatë përsëritet çdo vit në këtë sezon dhe rrezikon seriozisht aktivitetin e tyre dhe prodhimin e mjaltit. Përballë kësaj situate, bletërritësit kanë kërkuar ndërhyrjen e institucioneve vendore, duke i bërë thirrje bashkisë që të vendosë kufizime të qarta për oraret e spërkatjeve.

Përcaktimi i orareve të kontrolluara do të ndihmoj në mbrojtjen e bletëve, duke shmangur orët kur ato janë më aktive në terren.Specialistja e bujqësisë pranë bashkisë Lorena Zote shprehet se janë ndërmarrë masa konkrete për menaxhimin e situatës.

Ajo thekson se është vendosur një orar i kufizuar për kryerjen e spërkatjeve, me qëllim minimizimin e dëmeve tek bletët. Gjithashtu, kontrollet në terren janë shtuar dhe po kryhen nga policia bashkiake, për të siguruar zbatimin e rregullave dhe për të mbrojtur si fermerët, ashtu edhe bletërritësit.

Nëse këto masa do të zbatohen siç duhet, pritet që bashkëjetesa mes fermerëve dhe bletërritësve të jetë më e balancuar, duke shmangur dëmet dhe duke garantuar vijimësinë e të dy aktiviteteve.

Gazetare: B.Pëllumbi 

/rtsh.al/